Salman Khan Shahrukh Khan : बॉलिवुडमध्ये यावर्षी दोन्ही 'खान'चा जलवा बघायला मिळणार आहे. शाहरुख खान (Shahrukh Khan) आणि सलमान खान (Salman Khan) दोघेही पूर्ण ताकदीने कमबॅक करायला सज्ज आहेत. पण एकमेकांच्या विरोधात नाही तर एकमेकांना साथ देत ते आता पुढची वाटचाल करताना दिसत आहेत. शाहरुखचा बहुप्रतिक्षित 'पठाण' सिनेमा २५ जानेवारी रोजी रिलीज होत आहे. दरम्यान यावेळी बॉलिवुडच्या तीन चित्रपटांचा ट्रेलर किंवा टीझर बघायला मिळणार आहे. यात भाईजानच्या 'किसी का भाई किसी की जान' चा टीझरही प्रदर्शित होणार अशी माहिती सलमान खाननेच सोशल मीडियावरुन दिली आहे.
२५ जानेवारी तारीख आता सर्वांच्या मनात कोरली गेली असेल. ज्या सिनेमाने मोठा वाद झाला तो 'पठाण' या तारखेला रिलीज होतोय. शाहरुख खान ४ वर्षांनी मोठ्या पडद्यावर दिसणार आहे तेही अॅक्शन अवतारात. इतकंच नाही तर भाईजान सलमान खानचा कॅमिओ देखील असणार आहे. आता सलमानच्या चाहत्यांसाठी आणखी एक आनंदाची बातमी ती म्हणजे सलमान खानचा यावर्षी प्रदर्शित होणारा 'किसी का भाई किसी की जान' चित्रपटाचा टीझर 'पठाण' सिनेमाच्या आधी थिएटरमध्ये दाखवण्यात येणार आहे. त्यामुळे चाहत्यांना २५ जानेवारी रोजी डबल ट्रीट मिळणार आहे.
सलमान खान फिल्म्स प्रोडक्शन निर्मित 'किसी का भाई किसी की जान' हा सिनेमा एप्रिल महिन्यात रिलीज होणार आहे. सिनेमातील सलमानचा फर्स्ट लुक आधीच रिलीज झालाय. आता चाहत्यांना उत्सुकता आहे ती टीझरची. चित्रपटात 'पूजा हेगडे','वेंकटेश दुग्गुबती', 'जगपति बाबू', 'भूमिका चावला', 'विजेंदर सिंह', 'अभिमन्यू सिंह', 'राघव जुयाल', 'सिद्धार्थ निगम', 'शहनाझ गिल', 'पलक तिवारी', 'अब्दु' अशी मोठी स्टारकास्ट असणार आहे. अॅक्शन, कॉमेडी, ड्रामा आणि रोमॅन्स असा एकूणच मसालेदार चित्रपट असणार आहे. फरहाद सामजी यांनी सिनेमा दिग्दर्शित केला आहे.
याशिवाय शाहरुख खान आणि सलमान खानचे इतरही चित्रपट प्रदर्शित होण्याच्या मार्गावर आहेत. त्याच शाहरुख खानचा 'डंकी', 'जवान' तर सलमान खानचा टायगर ३ प्रदर्शित होणार आहे. यशराज फिल्म्सने पठाणच्या माध्यामातून स्पाय युनिव्हर्सची घोषणा केली आहे. याअंतर्गत 'पठाण', 'टायगर' आणि 'वॉर' एकत्रित येण्याची शक्यता आहे.