ऑनलाइन लोकमत
मुंबई, दि. 7 - खरं सांगायचं तर एखाद्या लहान मुलाने तरुणपणात अंकल अशी हाक मारली तर सगळेच संतापतात. इथे तर चक्क बॉलिवूड दबंग सलमान खानला वरुण धवनने अंकल अशी हाक मारली. आधीच छोट्या छोट्या गोष्टींवर वैतागणा-या सलमान खानचा पारा इतका चढला की त्याने कानाखाली वाजवण्याची धमकीच देऊन टाकली. पण त्यावेळी वरुण धवन फक्त सात वर्षांचा होता, त्यामुळे कदाचित सलमानने फक्त शब्दांचा मार दिला.
जुडवा चित्रपटाच्या स्क्रीनिंगसाठी वरुण धवन गेला होता. त्याचे वडिल डेव्हिड धवन यांनी या चित्रपटाचं दिग्दर्शन केलं होतं. सलमान खान या चित्रपटात मुख्य भूमिकेत होता. इतर मुलांप्रमाणे वरुण धवनने सलमान खानला अंकल अशी हाक मारली. आणि सलमान खानचा पारा चढला.
'जर मला अंकल हाक मारलीस तर तुझ्या कानाखाली वाजवेन. मला सलमान भाई म्हणायचं. तू डेव्हिड धवनचा मुलगा असला तरी मला फरक पडत नाही. तुला थिएटरच्या आत घुसू देणार नाही,' असं सलमानने त्या छोट्या धवनला सुनावलं होतं.
वरुण धवनने तेव्हापासून सलमान भाईचा धसकाच घेतला. त्यामुळेच की काय सलमान नाराज होईल म्हणून जुडवाच्या सिक्वेलमध्ये काम करण्यास नकार दिला होता. शेवटी वरुण धवनने चित्रपट करण्यास होकार दिला असून शुटिंगलाही सुरुवात झाली आहे. वरुण धवनने ट्विटरवरुन चित्रपटाचं पोस्टर शेअर केलं आहे. वरुण धवन यावेळी डबल रोलमध्ये दिसणार आहे. डेव्हिड धवनच सिक्वेलचही दिग्दर्शन करणार आहेत.