बॉलिवूड अभिनेता सोहेल खानची (Sohail Khan) एक्स वाईफ सीमा सजदेह (Seema Sajdeh)आता घराघरात ओळखली जाते. करण जोहरच्या ‘फॅब्युलस लाईव्स ऑफ बॉलिवूड वाइव्स’ या शोने तिला प्रचंड लोकप्रियता मिळवून दिली. हिच सीमा सजदेह सध्या वेगळ्याच कारणानं चर्चेत आहे. होय, 25 नोव्हेंबरला करण जोहरने एक पार्टी दिली. या पार्टीत सीमानेही हजेरी लावली. पण पार्टीनंतर जे काही झालं, ते पाहून लोकांनी तिला ट्रोल करायला सुरूवात केली.
होय, सीमाचा एक व्हिडीओ सध्या तुफान व्हायरल होतोय. शुक्रवारी रात्री करण जोहरच्या पार्टीत सीमा लेपर्ड प्रिंट ड्रेस घालून दिसली. तिची अतिशय स्टायलिश एन्ट्री झाली. यानंतर फोनवर बोलण्यासाठी सीमा करणच्या घराच्या गेटजवळ आली. पापाराझींचे कॅमेरे तिला क्लिक करायला सरसावले, पण हे काय? पापाराझींना पोझ देताना सीमाचा तोल गेला. तिने लगेच भिंतीचा आधार घेतला आणि कसंबसं स्वत:ला सावरलं. तिचा बोलण्याचा अंदाज बघून नेटकऱ्यांनी काढायचा तो निष्कर्ष काढला. अगदी इतकी प्यायची कशाला, अशा शब्दांत अनेकांनी तिला ट्रोल करायला सुरूवात केली. मुझे पीने का शौक नही... गम भुलाने को..., असं एका युजरने लिहिलं.
नुकताच सीमाने सलमान खानचा भाऊ सोहेल खान याच्याशी घटस्फोट घेतला. लग्नाच्या 24 वर्षांनंतर सोहेल व सीमा यांचा घटस्फोट झाला. सीमा व सोहेल अनेक वर्षांपासून वेगवेगळे राहत होते. एका शोमध्ये खुद्द सीमाने हा खुलासा केला होता. अर्थात आम्ही एक कुटुंब आहोत आणि सोहेल एक चांगला पिता आहे, असं ती म्हणाली होती.
सोहेल व सीमाने 1998 साली लग्न केलं होतं. दोघांना निर्वाण आणि योहान अशी दोन मुलं आहेत. सोहेल व सीमा यांच्या नात्यात असं काय बिनसलं की त्यांनी घटस्फोटाचा निर्णय घेतला, याचं खरं कारण अद्याप समोर आलेलं नाही. पण रिपोर्टनुसार, काही वर्षांआधी दोघांच्या संसारात कुरबुर सुरु झाली होती. काही वर्षांआधी सोहेलचं नाव अभिनेत्री हुमा कुरेशीसोबत जोडलं गेलं होतं. असं म्हणतात की, त्यावेळी सीमा घर सोडून गेली होती. तेव्हापासूनच दोघांमध्ये मतभेद निर्माण झालेत. हुमा कुरेशी व सोहेलची भेट सेलिब्रिटी क्रिकेट लीगदरम्यान झाली होती. हुमाला सोहेलने त्याच्या टीमची ब्रँड अ‍ॅम्बिसीडर बनवलं होतं. यानंतर बघता बघता सोहेल व हुमाच्या अफेअरच्या चर्चा व्हायला लागल्या होत्या. अर्थात हुमा व सोहेल दोघांनीही या सगळ्या अफवा असल्याचं स्पष्ट केलं होतं.