‘झीरो’ या चित्रपटानंतर शाहरूख खान ( Shah Rukh Khan) जणू मोठ्या पडद्यावरून गायब झाला होता. चाहते त्याला पाहायला आतूर झाले होते. अखेर प्रतीक्षा संपलीये. होय, किंगखान शाहरूखचा ‘पठाण’ (Pathaan) हा सिनेमाची रिलीज डेट आलीये. सोबत चित्रपटाचा टीझरही रिलीज झाला आहे.
शाहरूखने त्याच्या ट्विटर अकाऊंटवर ‘पठाण’चा टीझर शेअर केला आहे. यात शाहरूखचा दमदार लुक पाहायला मिळतोय. पुढीलवर्षी प्रजासत्ताक दिनाच्या मुहूर्तावर 25 जानेवारी 2023 रोजी ‘पठाण’ रिलीज होतोय. हिंदीसोबतच तामिळ आणि तेलगू भाषेतही हा सिनेमा प्रदर्शित होणार आहे.‘मला माहितीये, खूप वाट पाहावी लागलीये. पण आम्हाला तारीख लक्षात आहे. पठाणचा टाईम सुरू झालाये. 25 जानेवारी 2023 रोजी चित्रपटगृहांत हा ‘पठाण’ येतोय,’असं टीझर शेअर करताना शाहरूखने लिहिलं आहे.
कसा आहे टीझर...टीझरची सुरूवात जॉन अब्राहमच्या संवादाने होते. ‘हमारे देश में हम नाम रखते हैं हमारे धर्म और जाती से, लेकिन उसके पास ऐसा कुछ नहीं था...,’असं जॉन म्हणतो. पाठोपाठ दीपिका पादुकोण येते. ती सुद्धा पठानची ओळख करून देते. यानंतर शाहरूखची ‘पठाण’ लुकमध्ये एन्ट्री होते.
किंगखानचे चाहते सैराट...‘पठाण’ची रिलीज डेट आलीये, रिलीजसाठी आणखी 10 महिन्यांचा अवकाश आहे. पण किंगखानच्या या सिनेमाची एक छोटीशी झलक पाहून चाहते जणू सैराट झाले आहेत. सोशल मीडियावर तर जल्लोषाचे वातावरण आहे. ‘राजा वापस आ गया है...,’अशी कमेंट एका चाहत्याने केली.
मी रडतोय, तू रडतोय, सगळ्यांच्याच डोळ्यांत पाणी आहे. आमचा राजा परत आला आहे, अशी भावुक प्रतिक्रिया शाहरूखच्या एका चाहत्याने दिली आहे.
‘पठाण’चा टीझर पाहून ट्विटरवर शाहरूख खान, किंगखान व पठाण ट्रेंड करत आहेत. युजर्सनी शाहरूखचे धडाक्यात स्वागत केलं आहे.
दरम्यान या चित्रपटात शाहरुख खानसोबत अभिनेत्री दीपिका पादुकोण मुख्य भूमिकेत दिसणार आहे. याशिवाय अभिनेता जॉन अब्राहमची सुद्धा महत्त्वपूर्ण भूमिका आहे. शाहरुखचा 2018 मध्ये ‘झीरो’ हा चित्रपट प्रदर्शित झाला होता. या चित्रपटात तो मुख्य भूमिकेत दिसला होता. पण या चित्रपटाने बॉक्स ऑफिसवर फारशी कमाई केली नाही. त्यानंतर शाहरुखने कोणताही चित्रपट साइन केला नव्हता.