रितेश देशमुखच्या चित्रपटात शिव ठाकरेची वर्णी?, याबाबत अभिनेता म्हणाला...

Shiv Thakare : शिव ठाकरेला आता छोट्या पडद्यानंतर मोठ्या पडद्यावर काम करायचे आहे.

शिव ठाकरे (Shiv Thakare) याने छोट्या पडद्यावरील लोकप्रिय आणि वादग्रस्त रिएलिटी शो बिग बॉस मराठी(Bigg Boss Marathi 2)च्या दुसऱ्या पर्वाचे विजेतपद पटकावले. या शो नंतर त्याचे नशीबच बदलले. शिव या शोनंतर जास्त प्रसिद्धीझोतात आला. त्यानंतर तो हिंदी बिग बॉस शोच्या सोळाव्या सीझनमध्ये दाखल झाला. इतकेच नाही तर त्याने  फिनालेपर्यंत मजल मारली. शिव ठाकरे बिग बॉस १६(Bigg Boss 16)चा उपविजेता ठरला. 

शिव ठाकरेला आता छोट्या पडद्यानंतर मोठ्या पडद्यावर काम करायचे आहे. मराठीसोबतच हिंदी चित्रपटांमध्ये काम करण्याची त्याची इच्छा आहे. त्यासाठी तो सध्या मेहनतही घेत आहे. याबाबत नुकत्याच दिलेल्या एका मुलाखतीमध्ये त्याने सांगितले. तो म्हणाला की, मराठी चित्रपटांसाठी सध्या माझे काम सुरू आहे. पण रितेश देशमुख यांनी जर मला त्यांच्या चित्रपटद्वारे लाँच केले तर माझ्यासाठी ही मोठी गोष्ट असणार आहे. काही महिन्यांनंतर जर त्यांनी मला चित्रपटामध्ये काम करण्याची संधी दिली तर ही माझ्यासाठी आनंदाची बाब असेल.

रितेश देशमुखच्या सिनेमात काम करण्यासाठी शिव प्रयत्न करत आहे. त्याचे हे स्वप्न पूर्ण होणार का? हे आगामी काळात कळेल. सध्या शिव विविध प्रोजेक्ट्समध्ये व्यस्त आहे. त्याने स्वतःचे युट्यूब चॅनेल लाँच केले आहे. याशिवाय तो वेगवेगळ्या कार्यक्रमांनाही हजेरी लावताना दिसत आहे.