झी मराठी (Zee Marathi) वाहिनीवरील लोकप्रिय कॉमेडी शो चला हवा येऊ द्या (Chala Hawa Yeu Dya) गेल्या कित्येक वर्षांपासून प्रेक्षकांचे अविरत मनोरंजन करत आहे. या शोमध्ये भाऊ कदम (Bhau Kadam), कुशल बद्रिके (Kushal Badrike), श्रेया बुगडे (Shreya Bugde), निलेश साबळे (Nilesh Sable), भारत गणेशपुरे (Bharat Ganeshpure) हे कलाकार घराघरात पोहचले आहेत. या शोमधील प्रत्येक कलाकारांची प्रेक्षकांमध्ये खूप क्रेझ आहे. या शोला महाराष्ट्रातून खूप लोकप्रियता मिळते आहे. या शोमधील भाऊ कदम आणि कुशल बद्रिके या दोघांच्या जोडीने आतापर्यंत भरभरुन मनोरंजन केले आहे. ज्यांनी खळखळून प्रेक्षकांचे मनोरंजन केले, त्यांच्यावर संकट ओढावले आहे. भाऊ आणि कुशल या दोघांविरुद्ध माजी पोलीस अधिकाऱ्याने तक्रार दाखल केली आहे.
पांडू सिनेमात पोलिसांची टिंगलटवाळी केल्या प्रकरणी तक्रार दाखल केल्याचे समजते आहे. भाऊ आणि कुशल या दोघांनी पांडू चित्रपटात पोलिसाची भूमिका साकारली आहे. सेटवर अनेक कलाकार स्क्रीप्टसह तयारी करत बसलेले असताना पोलीस सेटवर आले. अचानक काय झाले म्हणून सर्वांचाच गोंधळ उडाला. सेटवर आलेल्या पोलिसांनी भाऊ आणि कुशल विरुद्ध माजी पोलीस अधिकाऱ्याने तक्रार दाखल केल्याचे सांगितले. त्यामुळे या दोघांना सेटवरुन बाहेर जावे लागले. सेटच्या बाहेर या अभिनेत्यांचे पोलिसांसोबत चर्चा झाली. यानंतर ते सेटवर परतले. भाऊ आणि कुशलने आपली बाजू पोलिसांसमोर मांडण्याचा प्रयत्न केला. पोलीस अधिकारी आणि या दोन्ही अभिनेत्यांचे बोलणे सुरु असतानाच निलेश साबळेने मध्यस्थी करण्याचा प्रयत्न केला.