ऑनलाइन लोकमत
मुंबई, दि. 5 - बॉलीवूडची सदाबहार अभिनेत्री रेखा पुन्हा एकदा चर्चेत आहे. रेखा यांच्या खासगी आयुष्याबाबत अनेक गोष्टींचा उलगडा अजूनपर्यंत झालेला नाही. काही दिवसांपूर्वी आलेल्या 'रेखा: द अनटोल्ड स्टोरी' या बायोग्राफीमध्ये रेखा यांच्या जीवनाबबात अनेक खुलासे करण्यात आले आहेत. रेखा कुणाच्या नावाचं कुंकू लावतात याबाबत एक धक्कादायक खुलासाही या पुस्तकात करण्यात आला आहे.
रेखा आणि अमिताभ बच्चन यांच्यातील नात्याची चर्चा सातत्याने होत असते. रेखा या अमिताभ बच्चन यांच्या नावाचं कुंकू लावत असल्याची चर्चा गेल्या अनेक वर्षांपासून होत आहे. मात्र, याबाबत आता एक वेगळाच खुलासा समोर आला आहे. अमिताभ यांच्या नावाचं नाही तर संजय दत्तच्या नावाचं रेखा कुंकू लावतात असा धक्कादायक खुलासा यासिर उस्मान यांनी रेखावर लिहिलेल्या 'रेखा: द अनटोल्ड स्टोरी' यामध्ये केला आहे. bollywoodlife.com ने याबाबत वृत्त दिलं आहे. रेखा यांचं लग्न मुकेश अग्रवाल यांच्यासोबत झालं होतं. मात्र, 1991 मध्ये मुकेश अग्रवाल यांचा मृत्यू झाला. अमिताभ आणि रेखामधील दुरावाही दिवसेंदिवस वाढत गेला.
या पुस्तकानुसार, 1984 मध्ये आलेल्या ‘जमीन-आसमान’ या सिनेमाच्या शूटींगवेळी रेखा आणि संजय दत्त हे जवळ आले होते. दोघं एकमेकांच्या प्रेमात पडले. सिनेमाचं शुटिंग संपता संपता दोघांनी अत्यंत गुप्तपणे लग्न केलं. त्यानंतर अनेक आठवडे दोघंही घरातून गायब झाले होते. अशाप्रकारच्या अनेक धक्कादायक गोष्टींचा खुलासा या पुस्तकात करण्यात आल्याचं वृत्त आहे.