'चला हवा येऊ द्या' आणि 'महाराष्ट्राची हास्यजत्रा' हे दोन्ही लोकप्रिय मराठी विनोदी शो आहेत. दोन्ही शो मधील कलाकार प्रेक्षकांचे फारच लाडके आहेत. चला हवा येऊ द्या फेम अभिनेत्री स्नेहल शिदम (Snehal Shidam) आणि हास्यजत्रा फेम अभिनेता निखिल बने (Nikhil Bane) यांचा एक फोटो सध्या सोशल मीडियावर व्हायरल होतोय. या फोटोमुळे यांचे सूत जुळले की काय असा संशय चाहत्यांना आलाय.
अभिनेत्री स्नेहल शिदम हिने इन्स्टाग्रामवर निखिलसोबतचा फोटो पोस्ट केला आहे.यामध्ये स्नेहलने केशरी रंगाची साडी नेसली आहे. साजेसे दागिने, अंबाडा आणि काहीसा मेकअप तिने केला आहे. तर निखिलने निळ्या रंगाचा कुर्ता घातला आहे. विशेष म्हणजे फोटोमध्ये स्नेहल लाजताना दिसत आहे. निखिलच्या हातात हात देत तिने त्याच्या खांद्यावर डोकं ठेवलं आहे. या गोड फोटोला तिने कॅप्शन दिले की, 'पिरतीच्या फडात ग, धरला हात असा, काळीज येंधलं आरल...'.
इतका गोड फोटो आणि असं रोमॅंटिक कॅप्शन वाचल्यावर कोणालाही दोघांमध्ये काहीतरी आहे असंच वाटेल. दोघांचा हा फोटो हास्यजत्रा फेम अभिनेत्री वनिता खरातच्या लग्नातला दिसतोय.स्नेहलने कॅप्शनच्या पुढे काही हॅशटॅग्स लिहिले आहेत. #bestfriendswedding तर आणखी एक हॅशटॅग देत तिने लिहिले 'वी आर जस्ट फ्रेंड्स' म्हणजेच आम्ही फक्त मित्र आहोत.
स्नेहलच्या या फोटोवर चाहतेच नाही तर कलाकारही संभ्रमात पडलेत. हे कधी झालं असा काहीसा प्रश्न सर्वांना पडला आहे. स्नेहलच्या पोस्टवर अभिनेत्री श्रेया बुगडेने कमेंट केली आहे. ती म्हणते, 'मला तू काहीच सांगितलं नाहीएस. माझ्या मेकअप रुममध्ये लगेच ये. अपडेट हवं आहे. तर हेमांगी कवीने 'बरं बरं बरं!' असं कॅप्शन लिहिलं आहे. याशिवाय एका चाहत्याने 'चला हवा येऊ द्या आणि महाराष्ट्राची हास्यजत्रा यांची युती झाली' असं भन्नाट कॅप्शन लिहिलं आहे.
आता स्नेहल आणि निखिल खरंच एकमेकांच्या प्रेमात आहेत का हे लवकरच कळेल. वनिता पाठोपाठ स्नेहलचाही नंबर लागतो का याची चाहत्यांना उत्सुकता आहे.