काही चित्रपटच ग्रामीण भागांपर्यंत पोहोचतात

तरुणींचा लाडका हँडसम बॉय भूषण प्रधान हा ‘पिंजरा’ या मराठी मालिकेतून महाराष्ट्राच्या घराघरांत पोहोचला. त्या वेळी कित्येक तरुणी या नवीन अभिनेत्याच्या सौंदर्यावर फिदा झाल्या होत्या. तरुणींच्या कंठातील ताईत बनलेल्या या अभिनेत्याने पिंजरानंतर ‘घे भरारी’, ‘कुंकू’, ‘ओळख’, ‘चारचौघी’ अशा अनेक मालिका छोट्या पडद्यावर गाजवल्या आहेत, तसेच मालिक ांनंतर हळूहळू या अभिनेत्याने आपला यशस्वी प्रवास चित्रपटाच्या दिशेने वळविला. त्यानंतर भूषणने मागे वळूनच पाहिले नाही. ‘सतरंगी रे, मिस मॅच, टाइमपास, टाइमपास २, कॉफी आणि बरचं काही’ असे एक से एक तगडे चित्रपट मराठी इंडस्ट्रीला दिले, तर काही चित्रपट यंदादेखील प्रदर्शित होण्याच्या मार्गावर आहेत. अशा या हँडसम हंक अभिनेता भूषण प्रधानचा ‘लोकमत सीएनएक्स’ने घेतलेला सेलिब्रिटी रिपोर्ट.कट्यार काळजात घुसली, नटसम्राट, लय भारी, दुनियादारी असे एक से एक सुपरहिट चित्रपट पाहता मराठी इंडस्ट्री भरारी घेत आहे, हे नक्की. सध्या तितक्या ताकदीचे चित्रपटदेखील बनत आहेत; पण हे सिलेक्टेड चित्रपटच मुंबई-पुणे शहरांसहित ग्रामीण भागातील प्रेक्षकांपर्यंत पोहोचतात. या चित्रपटांनादेखील कमी स्क्रीन मिळतात. त्यामुळे मराठी चित्रपटालादेखील प्रेक्षकवर्ग कमी मिळत असल्याचे दिसते. यासाठी ग्रामीण भागातदेखील मराठी थिएटरची संख्या वाढविणे आवश्यक आहे. तसेच तिकिटाचे दरदेखील सामान्य नागरिकांना परवडतील असे ठेवले पाहिजेत. सोमवार ते शुक्रवार हा पूर्ण आठवडा चित्रपट दाखविला गेला पाहिजे. जर शक्यच नसेल, तर ग्रामीण भागात मराठी चित्रपट हा तंबूपर्यंत तरी पोहोचला गेला पाहिजे.मराठी इंडस्ट्रीत सध्या सामाजिक, क्लासिकल, मनोरंजक असे अनेक चित्रपट येत आहेत. पण, मराठी प्रेक्षक हा क्लास-मासमध्ये न अडकता सर्वच चित्रपटांना पसंती देत असल्याचे दिसत आहे. कट्यार काळजात घुसली या क्लासिकल चित्रपटाप्रमाणेच ग्रामीण भागातील सामाजिक जीवनावर आधारित असलेला फॅन्ड्री चित्रपट, तर मनोरंजक असा टाइमपास या चित्रपटांनादेखील मराठी प्रेक्षकांनी कुठल्याही विभागात न अडकता भरभरून प्रतिसाद दिल्याचे दिसते. सगळ्या पद्धतींचे चित्रपट मराठी इंडस्ट्री साकारत आहे. पण, थिएटर प्रेक्षकांच्या वेळेनुसार उपलब्ध नसेल, तरी प्रेक्षक थिटरसच्या वेळेनुसार वेळ काढून चित्रपट पाहातात. अशा या आपल्या रसिक मायबाप प्रेक्षकांची अजूनही साथ असल्यामुळे आपली इंडस्ट्री उंचावर पोहोचली असल्याचे दिसते. एकाच दिवशी चार ते पाच चित्रपट प्रदर्शित होण्याविषयी विचारलं, तर बॉलिवूडमध्येदेखील सध्या हेच चित्र दिसत आहे. बॉलिवूड चित्रपटनगरीत चार ते पाच चित्रपटांपैकी बिग बजेट, तगडे स्टारकास्टसहित सशक्त कहाणी असणारे एक ते दोनच चित्रपट बॉक्स आॅफिसवर यश मिळवितात, तर बाकीचे चित्रपट अयशस्वी ठरतात. नेमके हेच चित्र मराठी इंडस्ट्रीतदेखील दिसते. त्यामुळे हे चित्र कुठे तरी बदलणे आवश्यक असल्याचे वाटते आणि त्यावर काही तरी उपाय नक्कीच निघू ही शकतो, कारण आपल्याकडे तेवढी हुशार मंडळीदेखील आहेत. मराठी चित्रपट हा तळागाळापर्यंत पोहोचविण्यासाठी डिस्ट्रीब्युटरनेदेखील लक्ष देणे आवश्यक आहे. बॉलिवूड चित्रपटांप्रमाणेच मराठी चित्रपटांनादेखील स्क्रीनिंगच्या वेळी तितकाच सन्मान मिळणे आवश्यक आहे. कारण डिस्ट्रीब्युटर चित्रपट रिलीजविषयी प्रॉमिस करतात आणि रिलीज डेट आली, तर ऐन वेळी नाही म्हणतात. तीन महिन्यांनी करू, पुढे पाहू, अशी टाळाटाळीची उत्तरे देतात. त्यामुळे डिस्ट्रीब्युटरने गॅरंटी देणे आवश्यक आहे. - बेनझीर जमादारप्रमोशनची क्रेझ पाहता, चित्रपटातील कलाकार दर वेळी सर्व ठिकाणी जाऊन प्रेक्षकांना भेटणे आवश्यक नाही. कारण कलाकारच प्रेक्षकांना जाऊन स्वत: भेटले, तर ते थिएटरमध्ये येऊन काय पाहणार? कलाकारांना पाहण्याची जी उत्सुकता असते, ती तशीच ठेवली गेली पाहिजे. प्रमोशन हे वृत्तपत्रे, टीव्ही, सोशल वेबसाइटच्या माध्यमातूनदेखील होऊ शकते. टीव्ही हा आता ग्रामीण भागातील घराघरांतदेखील पोहोचला आहे. त्यामुळे कलाकारांनी जाण्यायेण्यात खर्च न करता तो टीव्हीच्या प्रमोशन जाहिरातींवर अधिक केला, तर तो नक्कीच खेड्यापाड्यांतदेखील पोहोचेल व प्रेक्षकदेखील आवर्जून थिएटर किवा तंबूपर्यंत येऊन पोहोचेल.