सलग दोन ब्लॉकबस्टर चित्रपट देणारी बॉलिवूड अभिनेत्री झायरा वसीम हिने अचानक चित्रपटांतून संन्यास घेण्याचा निर्णय घेऊन सर्वांना आश्चर्याचा धक्का दिला. झायराच्या या निर्णयावरच्या प्रतिक्रिया अद्यापही थांबलेल्या नाहीत. काहींनी झायराच्या या निर्णयाला पाठींबा दिला आहे तर काहींनी यावरून झायराला ट्रोल केले आहे. आता आलिया भटची आई आणि अभिनेत्री सोनी राजदान यांनी झायराच्या या निर्णयावर आपली प्रतिक्रिया नोंदवली आहे.‘जे तुम्हाला मनापासून आवडते, परमेश्वरही तुम्हाला तेच देऊ इच्छितो, हे काही वर्षांनंतर झायराला कळेल, अशी मला आशा आहे. अभिनय म्हणजे स्वत: स्वत:ला भेटणे. याद्वारे तुम्ही वेगवेगळ्या भावभावना लोकांपर्यंत पोहोचवता. हे एक महान काम आहे,’असे त्यांनी लिहिले आहे. पुढे त्या लिहितात, ‘मी झायराच्या निर्णयाचा आदर करते. पण झायरा, तू सध्या खूप लहान आहेत. कदाचित पुढच्या चार वर्षांत तुझे विचार बदललेले असतील. तू परत आलीच तर आम्ही मोकळ्या मनाने तुझे स्वागत करू.’
अनुपम खेर यांनी झायराच्या निर्णयावर प्रतिक्रिया देताना, एका 16-17 वर्षांच्या मुलीने असा निर्णय घेणे, दुर्दैवी असल्याचे म्हटले होते. याऊलट बॉलिवूड सिंगर अभिजीत भट्टाचार्य, अभिनेता कमाल आर खान आदींनी हा झायराचा पब्लिसिटी स्टंट असल्याचे म्हटले होते.