'पुष्पा २'च्या सुपरहिट यशानंतर अल्लू अर्जुनची पोस्ट! शेअर केला सिनेमातील देवीच्या लूकमधील फोटो, म्हणतो- "गन्नमा..."

'पुष्पा २'ला मिळालेलं यश पाहून अल्लू अर्जुन भारावून गेला आहे. त्याने 'पुष्पा २'मधील गन्नमा देवीच्या वेशातील फोटो इन्स्टाग्रामवर शेअर केला आहे.

Pushpa 2: अल्लू अर्जुनचा 'पुष्पा २' ५ डिसेंबरला सर्वत्र प्रदर्शित झाला. २०२१ साली प्रदर्शित झालेल्या 'पुष्पा'चा सीक्वल असलेल्या 'पुष्पा २'साठी प्रेक्षकांना तब्बल ३ वर्ष वाट पाहावी लागली. 'पुष्पा' प्रमाणेच 'पुष्पा २'ला देखील प्रेक्षकांचं भरपूर प्रेम मिळत आहे. थिएटरमध्ये प्रदर्शित होताच सिनेमाचे शोज हाऊसफूल झाले आहेत.  पहिल्या दिवसापासूनच अल्लू अर्जुनच्या सिनेमाने बॉक्स ऑफिसवरील कमाईचे रेकॉर्ड मोडले आहेत. सिनेमाच्या सक्सेसनंतर अल्लू अर्जुनने खास पोस्ट शेअर केली आहे. 

'पुष्पा २'मधील अल्लू अर्जुनचा देवीच्या लूकमधील फोटो पाहून चाहते आश्चर्यचकित झाले होते. त्याचा हा अवतार पाहून सिनेमाबाबत चाहत्यांची उत्सुकता वाढली होती. 'पुष्पा २'मध्ये अल्लू अर्जुनने एका गाण्यात आणि नंतर एका सीनसाठी असा लूक केला आहे. आता 'पुष्पा २'ला मिळालेलं यश पाहून अल्लू अर्जुन भारावून गेला आहे. त्याने 'पुष्पा २'मधील गन्नमा देवीच्या वेशातील फोटो इन्स्टाग्रामवर शेअर केला आहे. हा फोटो शेअर त्याने "गन्नमा देवीचे आशीर्वाद" असं कॅप्शन त्याने दिलं आहे. 

दरम्यान, 'पुष्पा २'ने बॉक्स ऑफिसवर धमाका केला आहे. 'पुष्पा २' प्रदर्शनाच्या दिवसापासूनच बॉक्स ऑफिसवर चांगली कमाई करत आहे. पहिल्या दिवशी सिनेमाने १६४.२५ कोटींचा गल्ला जमवला. तर दुसऱ्या दिवशी ९३.८ कोटींची कमाई केली. शनिवारी 'पुष्पा २'ने ११९.२५ कोटी कमावले. तर रविवारी १४१.५ कोटींचा गल्ला जमवला. सॅकनिल्कने दिलेल्या रिपोर्टनुसार, अल्लू अर्जुनच्या 'पुष्पा २' सिनेमाने पहिल्या सोमवारी ६४.१ कोटींची कमाई केली आहे. आत्तापर्यंत या सिनेमाने बॉक्स ऑफिसवर ५९३.१ कोटींचा गल्ला जमवला आहे.