अल्लू अर्जुन आणि रश्मिका मंदाना मुख्य भूमिकेत असलेल्या 'पुष्पा २'सिनेमाची चाहते आतुरतेने वाट पाहत आहेत. पहिल्या भागानंतर या सिनेमाच्या सीक्वलच्या प्रतिक्षेत प्रेक्षक होते. अखेर हा सिनेमा अखेर डिसेंबर महिन्यात प्रेक्षकांच्या भेटीला येत आहे. अशातच 'पुष्पा २'च्या मेकर्सने चाहत्यांसाठी एक खुशखबर आणली आहे. 'पुष्पा २'च्या पार्श्वभूमीवर या सिनेमाचा पहिला भाग पुन्हा प्रदर्शित करण्याचा निर्णय घेण्याच्या तयारीत मेकर्स आहेत.
२०२१ साली 'पुष्पा : द राइज' हा सिनेमा प्रदर्शित करण्यात आला होता. अल्लू अर्जुनच्या या सिनेमाने प्रेक्षकांना अक्षरश: वेड लावलं होतं. पुष्पाची स्टाइल प्रेक्षकांना भावली होती. या सिनेमातील गाणी आणि डायलॉगही प्रचंड व्हायरल झाले होते. आता 'पुष्पा २'ची प्रेक्षक आतुरतेने वाट बघत असताना पुन्हा 'पुष्पा' सिनेमा रिलीज करण्यात येणार आहे. पण, भारतात नव्हे तर अमेरिकेत 'पुष्पा : द राइज' प्रदर्शित करण्यात येणार आहे. येत्या १९ नोव्हेंबरला अमेरिकेतील थिएटरमध्ये 'पुष्पा' प्रदर्शित करण्यात येईल.
अल्लू अर्जुनच्या 'पुष्पा २'ची परदेशातही क्रेझ पाहायला मिळत आहे. प्रदर्शनाआधीच अमेरिकेत सिनेमाची हजारो तिकिटे विकली गेली आहे. त्यामुळेच 'पुष्पा २' आधी 'पुष्पा' पुन्हा रिलीज करण्याचा निर्णय मेकर्सने घेतला आहे. तेलुगुमध्येही हा सिनेमा पुन्हा रिलीज करण्यात येत असल्याचं बोललं जात आहे. मात्र याबाबत अद्याप योग्य ती माहिती समोर आलेली नाही.
'पुष्पा २' सिनेमा देशभरात ५ डिसेंबरला प्रदर्शित केला जाणार आहे. तर अमेरिकेत ४ डिसेंबरला हा सिनेमा प्रदर्शित होईल. 'पुष्पा २ : द रूल' या सिनेमाचं दिग्दर्शन सुकुमार यांनी केलं आहे. ४००-५०० कोटींचं बजेट असलेला हा सिनेमा किती कमाई करतो, हे पाहणं औत्सुक्याचं असणार आहे. अल्लू अर्जून आणि रश्मिकासोबत या सिनेमात फहाद फासिल, सुनील, अजय, अनुसुया हे कलाकार दिसणार आहेत.