मुंबईकरांचं प्रेम पाहून भारावली रश्मिका मंदाना; भर कार्यक्रमात रडू लागली श्रीवल्ली; व्हिडीओ व्हायरल

अल्लू अर्जुन (Allu Arjun) आणि रश्मिका मंदानाचा (Rashmika Mandanna) बहुचर्चित 'पुष्पा २: द रुल' चित्रपट येत्या ५ डिसेंबरला रिलीज होणार आहे.

Rashmika Mandanna :अल्लू अर्जुन (Allu Arjun)आणि रश्मिका मंदानाचा  (Rashmika Mandanna) बहुचर्चित 'पुष्पा २: द रुल' चित्रपट येत्या ५ डिसेंबरला रिलीज होणार आहे. फर्स्ट डे, फर्स्ट शो पाहण्यासाठी चाहते आतुर झाले आहेत. सुकुमार यांच्या दिग्दर्शनाखाली बनलेल्या 'पुष्पा २'ची उत्सुकता शिगेला पोहोचली आहे. चित्रपटाचे अ‍ॅडव्हान्स बुकिंग हे आजपासून, अर्थात ३० नोव्हेंबरपासून सुरू होणार आहे. चित्रपटाचे बजेट जवळपास ४०० कोटी रुपये आहे. निर्मात्यांना आशा आहे की, बॉक्स ऑफिसवर हा चित्रपट १००० कोटींचा आकडा पार करेल.

दरम्यान, काल अभिनेत्री रश्मिका मंदानाने मुंबईमध्ये 'पुष्पा २: द रुल' चित्रपटाच्या प्रमोशनसाठी हजेरी लावली. सध्या अल्लू अर्जुन आणि रश्मिका दोघेही या चित्रपटाच्या प्रमोशनमध्ये व्यस्त आहेत. नुकतेच अल्लू अर्जुन आणि रश्मिका 'पुष्पा २' च्या प्रमोशनसाठी मुंबईत पोहोचले. यावेळी दोघांचेही मोठ्या थाटामाटात ढोल-ताशांच्या गजरात स्वागत करण्यात आलं. याप्रसंगी मुंबईकराचा उत्साह पाहून अभिनेत्री अक्षरश: भारावून गेली. शिवाय आपल्या चाहत्यांकडून मिळणारं प्रेम या सगळ्या गोष्टींमुळे रश्मिका मंदानाला अश्रू अनावर झाले. याचा व्हिडीओ सोशल मीडियावर समोर आला आहे. तिचा हा व्हिडीओ पाहून श्रीवल्लीचे चाहतेही भावुक झाल्याचं पाहायला मिळतंय. 

या व्हिडीओमध्ये काळ्या रंगाच्या साडीमध्ये ती अतिशय सुंदर आणि खुलून दिसत होती. शिवाय अल्लू अर्जूनने काळ्या रंगाचा ब्लेझर सूट परिधान केला होता. लक्षवेधी गोष्ट म्हणजे अल्लू अर्जूनच्या ब्लेझरच्या उजव्या हातावर 'पुष्पा-२' सिनेमाचं नाव लिहलेलं पाहायला मिळालं. 

दरम्यान, 'पुष्पा २' चित्रपटाच्या प्रदर्शनाची तारीख जसजशी जवळ येत आहे, तसतशी चाहत्यांमध्ये चित्रपट पाहण्याची उत्सुकता शिगेला पोहचली आहे.