नवीन वर्ष सुरू झालं आहे आणि नवीन वर्षात अनेकांनी नवीन रिसोलुशन्स करण्याचं ठरवलं आहे. कलाकारांनीही नवीन वर्षांत काहीतरी नवीन करण्याचं ठरवलं. आई कुठे काय करते (Aai Kuthe Kay Karte) फेम अभिनेत्री अश्विनी महांगडे (Ashwini Mahangade) हिने नवीन वर्षात नवीन सुरुवात केलीय. अश्विनी अभिनयासोबतच सामाजिक बांधिलकी जपताना दिसते. त्यामुळे नवीन वर्षात अश्विनीने मोठे पाऊल उचलले आहे. तिने महिलांच्या मार्गदर्शनासाठी नवीन संस्था सुरू केली आहे. FLYING ANGEL असं या संस्थेचं नाव असून सोशल मीडियावर काही फोटो शेअर करत याची माहिती दिली आहे.
अश्विनी महांगडे हिने फोटो शेअर करत लिहिले की, बरेच दिवस १ जानेवारीला नवीन काहीतरी करीत आहोत अशा पोस्ट पाहिल्या असतील. सगळ्यांच्या मनात प्रश्न उभे राहिले की आता हे काय नवीन करतात? मुळात आपल्या माणसांना सोबत घेवून पुढे जाणे याला मी आणि बाबा प्राधान्य देतो. पण जे सोबत आहेत त्यांची कष्ट करण्याची तयारी असायला हवी.
प्रत्येक पुरूषाने घरातील स्त्री ला तिच्यातील गुणांना वाव मिळावा यासाठी प्रत्येक पुरूषाने तिच्या पाठीशी उभे रहायला हवे. तुमची बहीण म्हणून मी अश्विनी महांगडे आणि भाऊ म्हणून निलेश बाबा जगदाळे कायम उभे आहोत. अट फक्त एक तुमच्या यशात आम्ही आमचे समाधान शोधू पणं तुम्ही मेहनत करायला कमी पडू नका. सविस्तर लवकरचं बोलूयात आज आत्ता फक्त सर्वांच्या अशीर्वादाने Flying Angel चा लोगो सादर करीत आहोत, असे तिने या पोस्टमध्ये म्हटले.