सध्या छोट्या पडद्यावर 'सुंदरा मनामध्ये भरली' आणि 'आई कुठे काय करते' या दोन मालिका टीआरपीच्या शर्यतीत यशस्वी घोडदौड करताना दिसत आहेत. दोन्ही मालिकांमध्ये येत असलेले रंगतदार वळणं या मालिका आणखीनच प्रेक्षकांचं लक्ष वेधून घेत आहेत. यामध्येच 'आई कुठे काय करते' या मालिकेतील एका लोकप्रिय अभिनेत्रीने आता 'सुंदरा मनामध्ये भरली' या मालिकेत एन्ट्री केली आहे. त्यामुळे सध्या सोशल मीडियावर या अभिनेत्रीची चर्चा रंगली आहे.
आई कुठे काय करते या मालिकेतील अंकिता आठवते का? अनघापूर्वी अभिषेकचं अंकितासोबत लग्न ठरलं होतं. मात्र, हे लग्न मोडल्यानंतर पुन्हा एकदा देशमुखांची सून होण्यासाठी अंकिताने आत्महत्येचा बनाव रचला होता. या मालिकेत अंकिताची भूमिका अभिनेत्री राधा सागर हिने साकारली होती. विशेष म्हणजे या मालिकेत काही भागांपूरती झळकलेली राधा आता लवकरच सुंदरा मनामध्ये भरली या मालिकेत झळकणार आहे.
राधा सागरने तिच्या इन्स्टाग्रामवर 'सुंदरा मनामध्ये भरली'चा एक प्रोमो शेअर केला आहे. या प्रोमोमध्ये तिचा चेहरा स्पष्टपणे दिसत नसला तरीदेखील तिने दिलेल्या कॅप्शनमधून ती या मालिकेचा भाग असल्याचं दिसून येत आहे. या मालिकेत राधा, अभिलाषा ही भूमिका साकारणार आहे.दरम्यान, या प्रोमोमध्ये अभिलाषाची सगळ्या प्रथम अभिमन्युसोबतच भेट होणार आहे. त्यामुळे अभ्याच्या आयुष्यात आलेली ही नवी मुलगी नवं वादळ घेऊन येणार की त्याची मैत्रीण होणार हा प्रश्न गुलदस्त्यात आहे. तसंच राधा या मालिकेत नेमकी कोणती भूमिका साकारणार, या मालिकेत नेमका कोणता ट्विस्ट येणार या सगळ्या प्रश्नांची उत्तरं प्रेक्षकांना मालिका पाहिल्यावरच मिळणार आहेत.