Bigg Boss Marathi Season 5 : 'बिग बॉस मराठी'चं नवं पर्व सुरू होऊन एक आठवडा पूर्ण झाला आहे. त्यानंतर या नव्या पर्वातील दुसरा आठवडा सुरू होताच बिग बॉसच्या घरातील चित्रही बदलताना दिसत आहेत. सुरुवातीला 'बिग बॉस'च्या घरामध्ये शांत दिसणारे स्पर्धक आता सक्रिय झाल्याचं पाहायला मिळतं आहे. त्यामुळे आता घरातील सदस्यांमध्ये दोन गट पडून सतत छोट्या मोठ्या गोष्टींवरून वाद होताना दिसताय. पहिल्याच आठवड्यात करन्सी टास्क दरम्यान स्पर्धकांमध्ये दोन्ही गटांमध्ये चांगलीच जुंपल्याचं पाहायला मिळालं.
दरम्यान, 'बिग बॉस'च्या घरामध्ये स्पर्धकांमध्ये होणारे वाद-विवाद पाहून नेटकऱ्यांसह कलाकार मंडळीही त्यावर आपल्या प्रतिक्रिया देतात. अशातच 'बिग बॉस मराठी पर्व ४' ची स्पर्धक मीरा जगन्नाथच्या इन्स्टाग्राम स्टोरीने सगळ्यांचं लक्ष वेधलं आहे.
पहिल्या आठवड्यातच 'बिग बॉस'च्या घरामध्ये करन्सी टास्क दरम्यान दोन्ही गटामध्ये झालेला राडा पाहून अभिनेत्री मीरा जगन्नाथनेही त्या वादात उडी मारली आहे. या स्टोरीमध्ये मीराने चक्क तिला ज्या स्पर्धकांचं वागणं खटकतंय त्यांच्या नावासहित टॅग करत फोटो शेअर केला आहे. सोशल मीडियावर ही स्टोरी शेअर करून अभिनेत्रीने त्यांना धारेवर धरलं आहे. 'बिग बॉस'च्या घरातील फोटो शेअर करत मीराने त्यात लिहलंय, "रात्री कोणाच्याही अंथरुणात जाणं चुकीचं आहे, आणि ही जान्हवी" असं लिहून तिने या स्टोरीच्या माध्यमातून अरबाज, निक्की वैभव आणि जान्हवीला खडेबोल सुनावले आहेत.
दरम्यान, 'बिग बॉस मराठी'च्या पाचव्या सीझनमधील पहिल्या आठवड्यात अंकिता वालावलकर, वर्षा उसगावकर, सूरज चव्हाण, योगिता चव्हाण, धनंजय पवार, पुरुषोत्तमदादा पाटील हे सदस्य नॉमिनेट झाले होते. त्यांच्यापैकी किर्तनकार पुरुषोत्तमदादा पाटील यांचा बिग बॉसच्या घरातील प्रवास संपला आहे. पुरुषोत्तम दादा पाटील हे यंदाच्या सीझनमधील बिग बॉसच्या घरातून बाहेर पडणारे पहिले स्पर्धक ठरले आहेत.
'बिग बॉस मराठी ५'चे स्पर्धक -
वर्षा उसगावकर, निखिल दामले, अंकिता वालावलकर, पंढरीनाथ कांबळे, योगिता चव्हाण, जान्हवी किल्लेकर, अभिजीत सावंत, घनश्याम दरवडे, इरिना रुडाकोवा, निक्की तांबोळी, वैभव चव्हाण, अरबाज पटेल, आर्या जाधव, पुरषोत्तम दादा पाटील, धनंजय पोवार, सूरज चव्हाण