झी मराठीवर 'हृदयी प्रीत जागते’ ही मालिका काही दिवसांपूर्वीच प्रेक्षकांच्या भेटीला आली आहे. मालिकेत अभिनेता पंकज विष्णू आपल्याला मनोहर मामाच्या भूमिकेत दिसतोय. पंकज गेले अनेक वर्षे मनोरंजन विश्वात काम करतोय, जवळपास ६ - ७ वर्षे झी टीव्हीसाठी पवित्र रिश्ता या मालिकेत काम केले आणि ती मालिका खूप गाजली.
या मालिकेबद्दल व आपल्या प्रवासा बद्दल बोलताना पंकज म्हणाला की, मनोहरने त्याच्या मागील आयुष्यात खूप काही सहन केले आहे, आणि त्याच्या आत खूप भावना दडवून ठेवल्या आहेत, मनोहरने आपल्या आयुष्यात खूप तडजोड केली आहे. या मालिकेत जशी प्रभास आणि वीणाची प्रेमकथा तुम्ही अनुभवणार आहात त्याच प्रमाणे मनोहरची देखील स्वतःची छुपी प्रेमकहाणी आहे, जी आपण पुढे पाहणार आहोत. त्यामुळे या मालिकेत मनोहरच्याही वेगवेगळ्या छटा प्रेक्षकांना पाहायला मिळतील. या मालिकेत बरेच ट्विस्ट आणि टर्न आपण पुढे पाहणार आहोत. प्रेक्षकांसाठी ही प्रेम कथा खूपच भावेल याची मला खात्री आहे आणि प्रेक्षक नक्कीच त्यांच्या प्रेमाचा वर्षाव करतील.
'हृदयी प्रीत जागते' ही मालिका एक तरुण संगीतमय प्रेमकथा आहे. ही कथा दोन तरुणांची आहे जे एकाच नाण्याच्या दोन बाजू आहेत.हे दोघेही त्यांच्या स्वभावात आणि जीवनशैलीत वेगळे ध्रुव आहेत पण संगीत हा त्यांच्यातील एकमेव समान धागा आहे. नायिका कीर्तन गायिका आहे आणि त्यांच्या घरात कीर्तनाची परंपरा आहे. तर नायक रॉक बँड परफॉर्मर आहे. ही भिन्नता असूनसुद्धा दोघांचंही संगीतावर जीवापाड प्रेम आहे.