सेट चित्रपटाचा असो वा मालिकेचा. इथले किस्से धम्माल असतात. अनेकदा सेटवर असे काही धम्माल किस्से घडतात की ते वाचून, पाहून हसू आवरत नाही. आता ‘सांग तू आहेस का’ या मालिकेच्या शूटींगदरम्यानचा एका अशाच किस्स्याचा धम्माल व्हिडीओ सध्या व्हायरल होतोय. होय, अभिनेत्री शिवानी रांगोळे हिने हा व्हिडीओ शेअर केला आहे. हा बिहाईंड द सीन व्हिडीओ पाहून तुम्हालाही हसू आवरणार नाही.
होय, शिवानीने स्वत: सोशल मिडीयावर एक व्हिडीओ शेयर केला आहे. यात शिवानी सिद्धार्थ चांदेकरसोबत शॉट देतेय. शिवानी अगदी कॅरेक्टरमध्ये घुसून संवाद म्हणताना दिसते. पण अचानक शिवानीला शिंक येते. कॅमेरा आणि शॉट सुरू असताना ती शिंकते. मग काय, सिद्धार्थ चांदेकर आणि सेटवरची अख्खी टीम हसू लागते. सेटवर अक्षरश: खसखस पिकते. हा मजेदार व्हिडीओ सध्या जबरदस्त व्हायरल होतोय.
‘बनमस्का’ मालिकेमुळे शिवानी रांगोळे हे नाव घराघरांत पोहोचले. त्यानंतर तिनेअनेक मालिकांमध्ये काम केले. शिवानी सध्या ‘सांग तू आहेस का’ या मालिकेत सिद्धार्थ चांदेकरसोबत मुख्य भूमिका साकारत आहे. यापूर्वी तिने ‘डॉक्टर बाबासाहेब आंबेडकर महामानवाची गौरव गाथा’ या मालिकेत बाबासाहेबांची पत्नी रमाबाई आंबेडकर यांची भूमिका साकारली होती. शिवानी रांगोळे सध्या तिच्या पर्सनल लाईफमुळेही चर्चेत आहे. ‘माझा होशील ना’ फेम अभिनेता विराजस कुलकर्णी आणि शिवानीच्या अफेअरच्या सध्या चर्चा सुरू आहेत.
शिवानीने अनेकदा विराजससोबतचे फोटो शेअर केले आहेत. अलीकडे सिद्धार्थ चांदेकर व मिताली मयेकर यांच्या लग्नात शिवानी व विराजस मॅचिंग कपड्यांत दिसले होते. यानंतर तर त्यांच्या अफेअरच्या चर्चांना आणखी जोर चढला. शिवानी आणि विराजस काही वर्षांपासून एकमेकांना ओळखतात. ‘डावीकडून चौथी बिल्डिंग’ या विराजसच्या नाटकात शिवानीने अभिनय केला होता. तेव्हाच त्यांची ओळख झाली.