‘अजूनही बरसात आहे’ (Ajunahi Barasat Ahe) ही मुक्ता बर्वे (Mukta Barve) आणि उमेश कामतची (Umesh Kamat) प्रेक्षकांना प्रचंड भावलेली मराठी मालिका. मुक्ता व उमेशची मालिकेतील केमिस्ट्री प्रेक्षकांना चांगलीच आवडली आणि म्हणूनच ही मालिका अल्पावधीत लोकप्रिय झाली. पण आता या मालिकेने प्रेक्षकांचा निरोप घेतला आहे. नुकताच या मालिकेचा शेवटचा एपिसोड टेलिकास्ट झाला. सर्वच कलाकारांनी भावुक वातावरणात मालिकेचा निरोप घेतला. अभिनेत्री मुक्ता बर्वे हिने सेटवरचा शेवटच्या दिवशी शूट केलेला एक व्हिडीओ सोशल मीडियावर शेअर केला. मुक्ताने आपल्या इन्स्टाग्राम अकाऊंटवर एक व्हिडीओ शेअर केला आहे. मुक्ताने शेअर केलेला हा व्हिडीओ तसा मजेशीर आहे. पण या व्हिडीओला मुक्ताने दिलेलं कॅप्शन भावुक करणारं आहे.
हा व्हिडीओ शेअर करत तिने लिहिलंय, ‘शुटींगचा शेवटचा दिवस... आमच्या पडद्या मागच्या सगळ्या टीमनी इतका सुंदर साजरा केला. सगळे मस्त नटून- थटून, झब्बे घालुन आले होते. एखादा सण आहे असं वाटत होतं आमची ही मंडळी पडद्यावर कधीच दिसत नाहीत. पण ही सगळीजणं आहेत म्हणूनच आम्ही तुम्हाला दिसु शकतो...आज सिरियलचा शेवटचा भाग टेलीकास्ट झाला. प्रेक्षक म्हणून तुम्ही सगळ्यांनी दिलेल्या प्रेमासाठी खूप खूप मनापासून आभार...’
सोनी मराठी वाहिनीवर ‘अजूनही बरसात आहे’चा पहिला भाग 12 जुलै 2021 रोजी प्रसारित झाला होता. मुक्ता बर्वे, उमेश कामत, राजन भिसे यांच्यासारखे मातब्बर कलाकार या मालिकेतून प्रेक्षकांच्या भेटीला आले. उमेश आणि मुक्ताची जोडी पहिल्यांदाच छोट्या पडद्यावर दिसणार असल्यामुळे प्रेक्षकांमध्ये देखील मालिकेबद्दल कमालीची उत्सुकता होती.
तरुण वयात एकमेकांच्या प्रेमात पडून काही कारणामुळे दुरावले गेलेले आदिराज आणि मीरा वयाच्या चाळीशीत पुन्हा एकदा भेटतात. गैरसमज दूर होत ते लग्न करण्याचा निर्णय घेतात. लग्नानंतरच्या अडीअडचणीवर मात करतात, हे या मालिकेत पाहायला मिळालं.
ही नवी मालिका येतेय... अजूनही बरसात आहे या मालिकेच्या जागी आता ‘असे हे सुंदर आमचे घर’ ही नवी मालिका उद्या सोमवारपासून प्रेक्षकांच्या भेटीला येत आहे. या नव्या मालिकेत संचिता कुलकर्णी, सुकन्या मोने, संयोगीता बर्वे हे कलाकार दिसणार आहे. सासू सुनेच्या प्रेमळ नात्यावर भाष्य करणारी ही मालिका प्रेक्षकांच्या पसंतीस उतरणार का हे पाहणं उत्सुकतेचं ठरणार आहे.