मराठी सिनेइंडस्ट्रीत सध्या लग्नाचे वारे वाहत आहेत. अक्षया देवधर-हार्दिक जोशी, आशय कुलकर्णी, सुमीत पुसावळे, कृतिका तुळसकर-विशाल देवरुखकर यांच्यानंतर आता आणखी एक सेलिब्रेटी कपल लग्नगाठ बांधणार आहे. हे जोडपे म्हणजे अभिनेता संकेत पाठक (Sanket Pathak) आणि अभिनेत्री सुपर्णा श्याम (Suparna Shyam). नुकताच त्यांचा साखरपुडा पार पडला. यादरम्यान सुपर्णाने संकेतला सरप्राईज देत त्याला प्रपोझ केला. याचा व्हिडीओ सध्या सोशल मीडियावर व्हायरल होताना दिसत आहे.
सुपर्णा श्याम आणि संकेत पाठक यांनी साखरपुड्याचा फोटो शेअर करत आनंदाची बातमी त्यांच्या चाहत्यांना दिली होती. इतकेच नाही तर संकेतला त्याच्या होणाऱ्या पत्नीने म्हणजेचे सुपर्णाने अगदी रोमॅण्टिक पद्धतीत लग्नासाठी प्रपोझ केले. या प्रपोजलमध्ये या दोघांनीही एकमेकांसाठी लग्नाआधीच धमाल उखाणा घेतला. याचा व्हिडीओ सुपर्णीने तिच्या सोशल मीडियावर शेअर केला आहे.
या व्हिडीओत सुपर्णा तिने या प्रपोझसाठी कशी तयारी केलीये हे सांगितलंय. तसंच हा व्हिडीओ शेअर करत तिने खास कॅप्शनही दिलंय. कॅप्शन देत तिने म्हंटलंय की, THE SURPRISE PROPOSAL.सगळ्यात आधी खूप खूप धन्यवाद तुम्ही आमच्यावर शुभेच्छांचा आणि आशीर्वादाचा वर्षाव करून आम्हाला इतका आनंद दिला आहे की तो शब्दात मांडणं खरंच खूप अवघड आहे, पण शुभेच्छांसाठी आभारी आहे. पण त्या बरोबरच खूप प्रश्नही उभी राहिले आहेत. गुपचुप साखरपुडा का उरकला? आम्हाला का नाही बोलावलं? लग्नाला तरी बोलणार का? आधी सांगितला पण नाही? आणि खूप काही... या सगळ्या साठी उत्तर म्हणून हा व्हिडिओ. नक्की पूर्ण बघा. परत एकदा खूप खूप खूप धन्यवाद. एवढं प्रेम दिल्याबद्दल आणि या पेक्षा जास्त प्रेमाची अपेक्षा करत here we present THE SURPRISE PROPOSAL " असं खास कॅप्शन सुपर्णाने हा व्हिडीओ शेअर करत दिलंय..
संकेत आणि सुपर्णाने काहीच दिवसांपूर्वीच गुपचुप साखरपुडा करत चाहत्यांना सुखद धक्का दिला.तसंच काही महिन्यांपूर्वी संकेतने सोशल मीडियावर त्यांच्या प्रेमाची कबूली दिली होती.
सुपर्णा आणि संकेतने दोन मालिकांमध्ये एकत्र काम केले आहे. दुहेरी आणि छत्रीवाली या दोन मालिकेत हे दोघही एकत्र दिसले होते. हे दोघही सोशल मीडियावर बरेच सक्रीय असून एकमेकांसोबतचे अनेक रोमॅण्टिक फोटो आणि व्हिडीओ दोघही शेअर करत असतात.