स्टार प्रवाह (Star Pravah) वाहिनीवरील लोकप्रिय मालिका 'आई कुठे काय करते' (Aai Kuthe Kay Karte)ने कमी कालावधीत रसिकांच्या मनात घर केले आहे. या मालिकेतील अरुंधती, अनिरुद्ध, आप्पा, कांचन आई, यश, ईशा, अभिषेक, अनघा, संजना, शेखर, नितीन आणि आशुतोष या सर्वच पात्रांनी प्रेक्षकांना आपलेसे केले आहे. सध्या या मालिकेतील अरुंधती आणि आशुतोष यांची केमिस्ट्री चाहत्यांना खूप भावते आहे.अरुंधतीनेदेखील अनिरुद्धप्रमाणे आशुतोषशी लग्न करून छान संसार केला पाहिजे, असे अनेकांना वाटते आणि हे लवकरच मालिकेत घडताना दिसणार आहे.
आई कुठे काय करते मालिकेत लवकरच अरुंधती आणि आशुतोषचं धुमधडाक्यात लग्न पार पडताना दिसणार आहे. खरेतर ही मालिका हिंदी टेलिव्हिजनवरील लोकप्रिय मालिका अनुपमावर आधारीत आहे. अनुपमा ही मालिकेचा ट्रॅक आई कुठे काय करतेच्या ट्रॅकच्या पुढे आहे. त्यामुळे सध्या अनुपमा मालिकेत अनुज आणि अनुपमा यांच्या लग्नाचा ट्रॅक सुरू आहे. हा ट्रॅक आपल्यालाही आई कुठे काय करतेमध्ये लवकरच पाहायला मिळेल.
मालिकेत काही दिवसांपूर्वी आप्पा आशुतोषला अरुंधतीशी लग्न करशील का असे विचारतात. तसेच आप्पा अरुंधतीलाही याबाबत विचार करायला सांगतात. अरुंधतीची देखील आशुतोष सोबत खूप चांगली मैत्री होताना दिसते आहे. कांचन आईनेदेखील आता आशुतोषला स्वीकारलं आहे. त्यामुळे आता त्या दोघांचे लग्न कसे होणार, हे पाहणे कमालीचे ठरणार आहे. तर दुसरीकडे संजनाने देशमुखांचे घर स्वतःच्या नावावर केले होते. अनिरुद्धने घटस्फोटाची धमकी दिल्यानंतर तिने घराचे पेपर आप्पांना परत केले. मात्र तिने घराचे कागदपत्र परत केले असले तर अनिरूद्ध तिच्यासोबत राहण्यासाठी तयार नाही. त्यामुळे आता अनिरुद्ध संजनाला घटस्फोट देईल का, की आप्पा अनिरुद्धची समज काढतील, हे आगामी भागात पाहायला मिळेल.