बोमन इराणी साकारणार सबसे बडा कलाकारमध्ये परीक्षकाची भूमिका?

मुन्नाभाई एमबीबीएस, लगे रहो मुन्नाभाई, थ्री इडियट यांसारख्या चित्रपटांमुळे प्रकाशझोतात आलेला अभिनेता बोमन इराणी आता प्रेक्षकांना वेगळ्या भूमिकेत पाहायला मिळणार आहे. बोमन आता छोट्या पडद्यावर झळकणार आहे. बोमनने याआधी बॉलिवूड का बॉस या कार्यक्रमाचे सूत्रसंचालन केले होते. त्यामुळे त्याच्यासाठी छोटा पडदा हा काही नवीन नाहीये. पण आता तो छोट्या पडद्यावर एका परीक्षकाच्या भूमिकेत झळकणार असल्याची चर्चा आहे.बॉलिवूडचे अनेक सेलिब्रेटी छोट्या पडद्यावर परीक्षकाच्या भूमिकेत आपल्याला पाहायला मिळतात. आता या सेलिब्रेटींमध्ये बोमनचा समावेश होणार आहे.सबसे बडा कलाकार हा नवा रिअॅलिटी शो लवकरच सुरू होणरा असून हा रिअॅलिटी शो खूपच मनोरंजक असणार असल्याची चर्चा आहे. सध्याच्या रिअॅलिटी शोपेक्षा हा कार्यक्रम वेगळा असल्याची जोरदार चर्चा सुरू आहे. या कार्यक्रमात एकूण तीन परीक्षक असणार असून रवीना टंडन आणि अर्शद वारसी या कार्यक्रमात परीक्षकाच्या खुर्चीत बसलेले आपल्याला पाहायला मिळणार आहेत. या दोघांनंतर या कार्यक्रमात बोमन इराणीची वर्णी लागल्याचे म्हटले जात आहे. बोमनच्या लोकप्रियतेचा विचार करून त्याला या कार्यक्रमासाठी विचारण्यात आले आहे. मालिकेच्या निर्मात्यांकडून बोमनला विचारण्यात आले असले तरी बोमनने यावर अद्याप काहीही निर्णय दिला नसल्याची चर्चा आहे. बोमनने हा कार्यक्रम स्वीकारल्यास पहिल्यांदाच बोमन परीक्षकाची भूमिका साकारताना आपल्याला पाहायला मिळणार आहे. अर्शद आणि बोमनची केमिस्ट्री आपल्याला मुन्नाभाईच्या दोन्ही भागांमध्ये पाहायला मिळाली होती. बोमन या कार्यक्रमाचा परीक्षक झाल्यास पुन्हा एकदा ही केमिस्ट्री प्रेक्षकांना अनुभवता येणार आहे. सबसे बडा कलाकार या कार्यक्रमाचे सूत्रसंचालन जय भानुशाली करणार आहे.