सोनी सबवरील ‘ध्रुव तारा - समय सदी से परे’ (Dhruv Tara) या मालिकेने ध्रुव (ईशान धवन) आणि ताराप्रिया (रिया शमा्र) यांच्‍यामधील अनोख्‍या रोमँटिक कथानकासह प्रेक्षकांचे लक्ष वेधून घेतले आहे. सर्व प्रेक्षकांनी या मालिकेचे भरभरून कौतुक केले आहे. सध्या या मालिकेत ट्विस्ट आला आहे. तारा आपल्या भावाच्या शस्त्रक्रियेत डॉ. ध्रुवला मदत करून, डॉक्टर बनण्याच्या आपल्या स्वप्नाच्या दिशेने एक पाऊल पुढे टाकणार का, हे पाहायला मिळणार आहे.
ध्रुव तारा ही एक सुंदर प्रेमकथा आहे, जी २१ व्या शतकातील ध्रुव (ईशान धवन) आणि १७ व्या शतकातील ताराप्रिया (रिया शर्मा) यांच्यातील विलक्षण प्रेम दर्शवते. या मालिकेचे आकर्षक कथानक, मंत्रमुग्ध करणारा साऊंडट्रॅक आणि ध्रुव व तारा यांच्यात फुलणारा रोमान्स यांनी प्रेक्षकांना भुरळ घातली आहे. ताराने आपल्या भावाच्या म्हणजे महावीरच्या (कृष्णा भारद्वाज) शस्त्रक्रियेत आपल्याला मदत करावी असा आग्रह करणारा ध्रुव प्रेक्षकांना आगामी भागांत दिसेल. तर, तारा ‘हे पाऊल उचलावे का’ या दुविधेत दिसेल.
घटनांच्या नाट्यमय वळणावर, ताराला आपली मदतनीस बनवण्यावरून ध्रुव राज सभेसमोर वादाच्या भोवर्‍यात अडकला आहे. एकंदरित, त्या दोघांच्या अडचणीत भर पडणार आहे, कारण राज सभेतील सर्वजण या कल्पनेला विरोध करत आहेत.