​‘कृष्णा चली लंडन’मध्ये छोट्या पडद्यावरची ही प्रसिद्ध अभिनेत्री दिसणार पाहुण्या कलाकारच्या भूमिकेत

‘स्टार प्लस’वरील ‘कृष्णा चली लंडन’ या नव्या मालिकेचे कथानक २१ वर्षीय लाघवी स्वभावाच्या राधे या तरुणाभोवती फिरते. राधेने आपल्या निष्पाप आणि लाघवी स्वभावाने सर्व रसिकांची मने जिंकली आहेत. या मालिकेत चित्रपट आणि टीव्ही मालिकांतील नामवंत कलाकारांना पाहुण्या कलाकाराच्या भूमिकेत प्रेक्षकांना पाहायला मिळत आहे. पाहुण्या कलाकाराच्या भूमिकेसाठी या क्षेत्रातील उत्कृष्ट कलाकारांची निवड करण्यावर निर्मात्यांनी आपला कटाक्ष ठेवला आहे. आता टीव्ही मालिकांमधील लोकप्रिय अभिनेत्री साक्षी तन्वरची एका छोटेखानी भूमिकेसाठी निवड करण्यात आली आहे. सूत्रांनी दिलेल्या माहितीनुसार, साक्षी ही एक बहुगुणी अभिनेत्री या मालिकेत एका नकारात्मक भूमिकेत दिसणार आहे. साक्षीने गेल्या अनेक वर्षांत छोट्या पडद्यावर खूप चांगल्या भूमिका साकारल्या आहेत. कहानी घर घर की या मालिकेत तिने साकारलेली पार्वती आजही प्रेक्षकांच्या चांगलीच स्मरणात आहे. तसेच बडे अच्छे लगते है या मालिकेत ती राम कपूर सोबत नायिकेच्या भूमिकेत दिसली होती. ही मालिका प्रेक्षकांनी अक्षरशः डोक्यावर घेतली होती. साक्षीने केवळ छोट्या पडद्यावरच नव्हे तर मोठ्या पडद्यावर देखील खूप चांगल्या भूमिका साकारल्या आहेत. कट्यार काळजात घुसली या मराठी चित्रपटात ती एका महत्त्वाच्या भूमिकेत झळकली होती तर आमिर खानच्या दंगल या प्रसिद्ध चित्रपटात प्रेक्षकांना तिला आमिरच्या पत्नीच्या भूमिकेत पाहायला मिळाले होते. छोट्या पडद्यावरची एक गुणी अभिनेत्री म्हणून साक्षीकडे पाहिले जाते.साक्षीसोबत काम करण्यासाठी कृष्णा चली लंडन या मालिकेची संपूर्ण टीमच उत्सुक आहे. ती या मालिकेत एका वेगळ्याच रूपात दिसणार आहे. साक्षीने आजवर कधीच नकारात्मक भूमिका साकारली नसल्याने प्रेक्षकांना तिला एका वेगळ्या भूमिकेत पाहायला नक्कीच आवडेल असे मालिकेच्या टीममधील मंडळीचे म्हणणे आहे. मालिकेत साक्षी सुष्मिता मुखर्जीच्या धाकट्या बहिणीची भूमिका साकारणार असून तिच्या भूमिकेमुळे राधेच्या जीवनाला नवी दिशा मिळणार आहे. आपल्या नावीन्यपूर्ण नात्याने ही बहिणींची जोडी छोट्या पडद्यावर जादू निर्माण करील आणि अधिकाधिक प्रेक्षकांना आपल्या मालिकेकडे आकर्षित करतील अशी या मालिकेच्या टीमला खात्री आहे. Also Read : साक्षी तन्वर आणि श्वेता कवात्राची करले तू भी मोहोब्बत या वेबसिरीजद्वारे 12 वर्षांनी जमली जोडी