सोनी एन्टरटेन्मेंट टेलिव्हिजनवर सध्या प्रेक्षकांना इंडियन आयडल या कार्यक्रमाचा दहावा सिझन पाहायला मिळत आहे. आजवरच्या सगळ्या सिझनप्रमाणे हा सिझन देखील हिट गेला असून या सिझनमधील स्पर्धकांच्या अद्भुत परफॉर्मन्सेसमुळे प्रेक्षकांचे चांगलेच मनोरंजन होत आहे. इंडियन आयडल या कार्यक्रमाच्या नुकत्याच झालेल्या भागात सर्वात कमी गुण मिळवणारा आणि प्रेक्षकांची कमी मते मिळवणारा स्पर्धक हा मंच सोडून जाणार होता. खडकपूर, कोलकाताची 17 वर्षांची सोनिया गझमेर, जी एक अप्रतिम गायिका होती, ती आपले स्वप्न अपूर्ण ठेवून स्पर्धेतून बाद होणारी पहिली स्पर्धक ठरली. असे असले तरी, मुंबई सोडण्यापूर्वी तिच्या मनातील एक इच्छा मात्र पूर्ण झाली.
सोनिया ही सलमान खानची मोठी चाहती आहे आणि तिला प्रत्यक्ष सलमान खानशी बोलण्याची संधी मिळाली. दस का दमच्या सेटवर जेव्हा ती सलमानला भेटली तेव्हा त्याच्या व्यक्तिमत्वाने ती भारून गेली होती. तिने त्याच्यासोबत फोटो काढले. शिवाय सलमानने तिला तिच्या जीवनात उपयोगी पडतील अशा काही सूचना दिल्या. आनंदित झालेली सोनिया या तिच्या अनुभवाविषयी सांगते, “मला मिळालेले गुण आणि मते ही कमी पडल्यामुळे मला आज माझे स्वप्न तात्पुरते बाजूला ठेवावे लागत आहे. पण जेव्हा सोनी वाहिनीने मला हे सांगितले की, सलमानला भेटण्याची माझी इच्छा ते पूर्ण करतील, तेव्हा मी खूप रोमांचित झाले होते. सलमानच्या उपस्थितीने मी अगदी भारून गेले होते. मी त्याच्यासोबत फोटो काढल्यानंतर त्याने संभाषण देखील सुरू केले. त्याने मला सांगितले की, मला अधिक रियाज करावा लागेल आणि अपयश ही यशाचीच एक पायरी असते. माझ्यासाठी माझ्या नव्या प्रवासाची ही सुरुवात असेल. मला ही संधी दिल्याबद्दल मी इंडियन आयडल १० आणि सोनी वाहिनीची मनःपूर्वक आभारी आहे.” सोनिया ही एक पार्श्वगायिका आणि स्टेज परफॉर्मर आहे. ती भविष्यात एक प्रसिद्ध गायिका बनेल अशी तिला खात्री आहे.