छोट्या पडद्यावरील लोकप्रिय सिंगिंग रिएलिटी शो इंडियन आयडॉल १२(Indian Idol 12)चा विजेता पवनदीप राजन (Pawandeep Rajan)ने आपल्या सुरेल आवाजाने प्रेक्षकांच्या मनात घर केले आहे. तो सध्या त्याच्या आगामी प्रोजेक्ट्सच्या कामात बिझी आहे. मात्र फार कमी लोकांना माहित आहे की, पवनदीप राजनने एफ यु: फ्रेंडशीप अनलिमिटेड या मराठी चित्रपटात काम केले आहे. या चित्रपटात त्याने आकाश ठोसरच्या मित्राची भूमिका केली होती. त्यानंतर आता त्याने मराठी सिनेइंडस्ट्रीत कमबॅक केले आहे. आता त्याने महेश मांजरेकर (Mahesh Manjarekar) यांच्या पांघरूण (Pangharun Movie) चित्रपटातील एक गाणे संगीतबद्ध केले आहे.
निर्माते-दिग्दर्शक महेश मांजरेकर यांचा आगामी पांघरुण चित्रपट लवकरच प्रेक्षकांच्या भेटीला येणार आहे. या चित्रपटातील सर्व गाण्यांना प्रेक्षकांची चांगलीच पसंती मिळत आहे. मात्र यातील ‘सतरंगी रे’ या गाण्याने प्रेक्षकांचे लक्ष वेधून घेतले आहे. ‘सतरंगी रे’ हे गाणे पवनदिप राजन याने संगीतबद्ध केले आहे आणि आनंदी जोशीने हे गाणे गायले आहे. हे गाणे प्रेक्षकांच्या पसंतीस पडत आहे. पवनदीप मराठी नसूनही त्याचे उच्चार आणि शब्द स्पष्ट असल्याने त्याचे कौतुक होत आहे.‘पांघरूण’ हा चित्रपटही एका गंभीर विषयावर भाष्य करतो. पवनदीप राजन व्यतिरिक्त हितेश मोडक, डॉ. सलील कुलकर्णी आणि अजित परब यांनी चित्रपटाला संगीत दिल आहे, तर वैभव जोशी यांनी या गाण्यांना शब्दबद्ध केले आहे. पांघरूण ४ फेब्रुवारी रोजी प्रेक्षकांच्या भेटीला येणार आहे.