Kumkum Bhagya मध्ये मोठा बदल; 7 वर्षांनंतर शब्बीर अहलूवालियाने सोडली मालिका?;कारण...

Shabir ahluwalia:या मालिकेतून अभिषेक मेहराची भूमिका साकारणारा अभिनेता शब्बीर अहलूवालिया याने मालिकेतून काढता पाय घेतल्याचं सांगण्यात येत आहे.

छोट्या पडद्यावरील लोकप्रिय मालिका म्हणजे 'कुमकुम भाग्य' (Kumkum Bhagya). गेल्या कित्येक वर्षांपासून ही मालिका अवितरपणे प्रेक्षकांचं मनोरंजन करत आहे. आतापर्यंत या मालिकेत अनेक बदल झाल्याचं पाहायला मिळालं. या मालिकेतील प्रज्ञा आणि अभिषेक या जोडीला प्रेक्षकांची विशेष पसंती मिळाली. परंतु, आता या मालिकेतून अभिषेक मेहराची भूमिका साकारणारा अभिनेता शब्बीर अहलूवालिया (shabir ahluwalia) याने मालिकेतून काढता पाय घेतल्याचं सांगण्यात येत आहे.

सूत्रांच्या माहितीनुसार, शब्बीर या मालिकेत जवळपास ७ ते ८ वर्षांपासून काम करत होता. मात्र, आता त्याने ही मालिका सोडण्याचा निर्णय घेतला आहे.  शब्बीरने त्याच्या करिअरच्या दृष्टीने काही नवे प्लॅन्स आखल्यामुळे हा निर्णय घेतल्याचं म्हटलं जात आहे. परंतु, याविषयी शब्बीरने अद्याप कोणताही खुलासा केलेला नाही.

खरंच शब्बीर सोडणार कुमकुम भाग्य? 

मालिकेची निर्माती एकता कपूर आणि शब्बीर यांची खूप चांगली मैत्री आहे. त्यामुळे त्याने ही मालिका जरी सोडली तरीदेखील त्यांच्यातील मैत्री कायम राहणार असल्याचं सांगण्यात येतं. सूत्रांच्या माहितीनुसार, शब्बीर एका नव्या मालिकेत झळकणार असल्यामुळे त्याने कुमकुम भाग्य सोडली आहे. परंतु, याविषयी शब्बीर वा मालिकेच्या टीमकडून याविषयी कोणताही दुजोरा अद्याप देण्यात आलेला नाही.

यश पटनायकच्या मालिकेत झळकणार शब्बीर

यश पटनायक यांची नवी मालिका लवकरच प्रेक्षकांच्या भेटीला येत आहे. या मालिकेत शब्बीरला मोठी संधी मिळाली आहे. ही मालिका मार्चच्या अखेरीस प्रेक्षकांच्या भेटीला येईल. ही मालिका एका लव्ह स्टोरीवर आधारित आहे. यात शब्बीर लीड रोलमध्ये झळकणार आहे.