​कपिल शर्माचा शो होणार बंद?

द कपिल शर्मा शोचा टिआरपी गेल्या काही महिन्यांपर्यंत खूपच चांगला होता. त्यामुळे कोणताही कलाकार त्याच्या चित्रपटाच्या प्रमोशनसाठी पहिली पसंती द कपिल शर्मा शोला देत असे. पण आता तशी परिस्थिती राहिलेली नाही. काही महिन्यांपूर्वी कपिलची संपूर्ण टीम सिडनीला एका कार्यक्रमासाठी गेली होती. पण सिडनीहून परतत असताना विमानात कपिल शर्माने दारू पिऊन धिंगाणा घातला. तसेच सुनील ग्रोव्हरला अतिशय वाईट शब्दांत सुनावले. एवढेच नव्हे तर त्याला चप्पलने चोपलेदेखील होते. यानंतर सुनील, अली असगर आणि चंदन प्रभाकर यांनी या कार्यक्रमाला रामराम ठोकला.कपिलच्या शोमध्ये सुनील, अली नसल्याने कार्यक्रमातील मजाच गेली आहे. कपिलने सुमोना चक्रवर्ती, उपासना सिंग यांना कार्यक्रमात परत आणून टिआरपी मिळवण्याचा प्रयत्न केला. पण त्याचा तो प्रयत्न देखील अयशस्वी ठरला. कार्यक्रमाला टिआरपी नसल्याने सगळ्या कलाकारांनी या कार्यक्रमाकडे पाठ फिरवली आहे. कोणताही प्रसिद्ध कलाकार या कार्यक्रमात गेल्या काही दिवसांत आलेला नाही. सलमानच्या ट्युबलाईट या चित्रपटाची गेल्या कित्येक दिवसांपासून चर्चा आहे. या चित्रपटाचे सलमान जोरदार प्रमोशन करत आहे. या चित्रपटाच्या प्रमोशनसाठी सलमानने द कपिल शर्मा शो ला यावेळी पसंती दिली नाही. तो सोनी या वाहिनीवर चित्रपटाच्या प्रमोशनसाठी सुपर नाइट या कार्यक्रमात झळकणार आहे आणि या कार्यक्रमात त्याच्यासोबत अली असगर, सुगंधा मिश्रा आणि संकेत भोसले असणार आहेत. या कार्यक्रमाचा प्रोमो नुकताच प्रेक्षकांच्या भेटीस आला आहे.द कपिल शर्मा शो या कार्यक्रमाचा ढासळता टिआरपी पाहाता कपिलच्या या कार्यक्रमाला लवकरच गाशा गुंडाळावा लागणार आहे असे म्हटले तर ते चुकीचे ठरणार नाही.