टीव्हीवरील अनेक लोकप्रिय रिएलिटी शोपैकी एक म्हणजे 'खतरों के खिलाडी'. चंदेरी दुनियातील सितारे खतरनाक स्टंट करताना या शोमध्ये दिसतात. रोहित शेट्टी या शोमध्ये स्टंट करायला लावून ग्लॅमरस दुनियेतील सेलिब्रिटींना थेट आसमान दाखवतो. 'खतरों के खिलाडी' या रिएलिटी शोचा लवकरच नवा सीझन लवकरच प्रेक्षकांच्या भेटीला येणार आहे. सध्या रोमानियामध्ये या शोचं शूटिंग सुरू आहे. यादरम्यान, अभिनेता शालिन भनोटला दुखापत झाली आहे.
बिग बॉस फेम शालिन भनोट 'खतरों के खिलाडी १४'मध्ये सहभागी झाला आहे. शालिनचा शूटिंगदरम्यानचा एक व्हिडिओ समोर आला आहे. 'खतरों के खिलाडी १४'मध्ये स्टंट करताना शालिनला दुखापत झाली आहे. या शोमध्ये स्टंट करणं शालिनला महागात पडलं आहे. 'खतरों के खिलाडी'मध्ये रोहित शेट्टी स्पर्धकांना कधी उंचावरुन खाली उडी मारण्याचे तर कधी प्राण्यांबरोबर खतरनाक स्टंट करायला सांगतो. हे स्टंट करताना स्पर्धकांच्या नाकी नऊ येतात. असाच एक स्टंट करणं शालिन भनोटला महागात पडलं आहे. विरल भय्यानीच्या इन्स्टाग्राम पेजवरुन शालिनचा'खतरों के खिलाडी १४'च्या सेटवरील एक व्हिडिओ शेअर करण्यात आला आहे. या व्हिडिओत शालिनच्या चेहऱ्याला दुखापत झाल्याचं दिसत आहे. स्टंट करताना तब्बल २०० विंचू शालिनला चावले असल्याचं या व्हिडिओत म्हटलं गेलं आहे. अनेक विंचवांनी चावा घेतल्याने शालिनचा चेहरा सुजल्याचं व्हिडिओत पाहायला मिळत आहे. या व्हिडिओवर कमेंट करत चाहत्यांनी शालिनबाबत चिंता व्यक्त केली आहे.
'खतरों के खिलाडी १४'मध्ये सुमोना चक्रवर्ती, शिल्पा शिंदे, गश्मीर महाजनी, आशीष मेहरोत्रा, निमृत कौर अहलुवालिया, शालीन भनोत, अभिषेक कुमार, समर्थ जुरेल, नियती फतनानी, करणवीर मेहरा, आदिती शर्मा, आसिम रियाज आणि कृष्णा श्रॉफ हे कलाकार दिसणार आहेत.