अभिनेत्री किशोरी गोडबोलेची (Kishori Godbole) लेक सई गोडबोले (Sai Godbole) अतिशय टॅलेंटेड आहे हे सर्वांनाच माहित आहे. सई वेगवेगळ्या भाषा त्या विशिष्ट अंदाजात बोलू शकते. शिवाय तिचा आवाजही खूप छान आहे. ती डान्सही उत्तम करते. सोशल मीडियावर सईचे अनेक व्हिडिओ व्हायरल होत असतात. किशोरी यांना लेकीचा अभिमान वाटतो. आता नुकतंच सईने आणखी उंच भरारी घेतली आहे. ती 'अॅपल'ची ब्रँड अँबेसिडर म्हणून नियुक्त झाल्याचा खुलासा किशोरी यांनी केला.
लॉस एंजिलिस येथे झालेल्या अॅपलच्या इव्हेंटमध्ये सई गोडबोलेला आमंत्रित करण्यात आलं होतं. तेथील लेकीचे फोटो शेअर करत किशोरी लिहितात, "सई माझी मुलगी अॅपलची ब्रँड अँबेसिडर बनली आहे. गेल्या आठवड्यात ती लॉस एंजिलिस येथील अॅपलच्या इव्हेंटमध्ये आमंत्रित होती. माझ्या बहुगुणी लेकीसाठी ही अभिमानाची गोष्ट आहे. तुझं टॅलेंट तुला वेगवेगळ्या ठिकाणी नेऊ शकतं हे पुन्हा सिद्ध झालं. अशीच मोठी हो, प्रगती करत राहा. सुंदर व्यक्ती आहेस तशी राहा. मला तुझा अभिमान वाटतो."
किशोरी गोडबोलेंच्या या पोस्टवर इतर कलाकार आणि चाहत्यांनी कमेंट करत सईचं अभिनंदन केलं आहे. किशोरी गोडबोले या लग्नानंतर अभिनयापासून दूर झाल्या. 'अधुरी एक कहानी' ही त्यांची मालिका खूप गाजली होती. याशिवाय त्यांनी 'फुल ३ धमाल', 'खबरदार', 'कोहराम', 'वन रूम किचन', 'माझा नवरा तुझी बायको', 'हवाहवाई' यांसारख्या चित्रपटांतही काम केले आहे.