नवी मालिका म्हटलं की, नवे चेहरे, नव्या जोड्या प्रेक्षकांच्या भेटीस येतात. ‘सुंदर आमचे घर’ ( Sundar Amche Ghar )ही नवी कोरी मालिका लवकरच आपल्या भेटीस येत आहे. सोनी मराठीवर (Sony Marathi ) येऊ घातलेल्या या मालिकेतील सुकन्या कुलकर्णी आणि उषा नाडकर्णी हे दोन चेहरे तसे सर्वांचेच ओळखीचे. पण या मालिकेत आणखी एक चेहरा आहे आणि तो म्हणजे, संचिता कुलकर्णीचा (Sanchitaa Kulkarni ) .
होय, सुकन्या कुलकर्णी, उषा नाडकर्णी यांना याआधी आपण सासूच्या भूमिकेत पाहिलं आहे. आता त्यांच्यासोबत अभिनेत्री संचिता कुलकर्णी ही सुकन्या कुलकर्णी यांच्या सूनेच्या भूमिकेत प्रेक्षकांना पाहायला मिळणार आहे. संचिता कुलकर्णीचा चेहरा काही जणांसाठी नवीन जरी असला तरी तिने याआधी अनेक कामं केली आहेत. चला तर मग जाणून घेऊया संचिता कुलकर्णी नेमकी आहे तरी कोण?
तर संचिता मूळची नागपुरची आहे. शिक्षण पूर्ण झाल्यानंतर संचिता आरजे म्हणजेच रेडिओ जॉकी होती. हे काम करतानाच तिला मालिकांमध्ये काम करण्याची संधी मिळाली. संचिताने याआधी झी मराठीवरील ‘जाडूबाई जोरात’ मालिकेत काम केलं होतं. याशिवाय बंध रेशमाचे, अरुंधती या मालिकांमध्ये सहाय्यक भूमिकेत दिसली होती.
मराठीसोबतंच तिने हिंदी मालिकांमध्ये देखील आपलं नाव कमवलं आहे. चिडीया घर, प्यार की एक कहानी या मालिकांमध्ये ती दिसली होती. स्टार प्रवाह वरील प्रीती परी तुजवरी या मालिकेत संचिता मुख्य भूमिकेत झळकली होती. त्यानंतर आता ‘सुंदर आमचे घर’ या मालिकेच्या निमित्ताने ती पुन्हा एका मुख्य भूमिकेतून प्रेक्षकांसमोर येणार आहे.
‘सुंदर आमचे घर’चा प्रोमो रिलीज झाला आहे आणि तो प्रेक्षकांना प्रचंड आवडला आहे. येत्या 14 मार्चपासून ही मालिका सुरू होतेय आणि ती पाहायला प्रेक्षक उत्सुक आहेत. आता या मालिकेला प्रेक्षक कसा प्रतिसाद देतात, ते बघूच.