​जाणून घ्या तारक मेहता का उल्टा चष्मा या मालिकेतील वॉशिंग मशिनचे काय आहे रहस्य

तारक मेहता का उल्टा चष्मा या मालिकेत नेहमीच काही ना काही तरी विचित्र गोष्टी घडत असतात. तसेच कोणत्या ना कोणत्या कारणामुळे जेठालाल टेन्शनमध्ये असतो. या मालिकेत आता जेठालाल आणखी एका टेन्शनमध्ये असल्याचे आपल्याला पाहायला मिळणार आहे.जेठालालचे गडा इलेक्ट्रॉनिक्स हे दुकान असून या दुकानात फ्रीज, वॉशिंग मशिन, मोबाईल यांची तो विक्री करतो. बाजारात एक खूप चांगली वॉशिंग मशिन आल्याचे जेठालालला कळल्यामुळे त्याने ती मशिन आपल्या दुकानात मागवली आहे. लोक मोठ्या संख्येने ही मशिन विकत घेतील याची त्याला खात्री आहे आणि विशेष म्हणजे जेठालालच्या दुकानातील पहिली वॉशिंग मशिन दुसरे कोणी नाही तर बबिताने घेतली आहे. बबिताने आपली मशिन घेतली असल्याने जेठालाल खूप खूश झाला आहे. पण या मशिनमुळे गोकुळधाम सोसायटीमध्ये प्रचंड गोंधळ निर्माण होणार आहे.बबितासाठी ही वॉशिंग मशिन जेठालालने चांगली पॅक करून तिच्या घरी पाठवली आहे. मशिन घरात आली त्याच दिवशी बबिता आणि अय्यर एक भूताचा चित्रपट पाहायला गेले आहेत. पण रात्री घरी परतल्यावर त्यांना झोपेत वेगवेगळे आवाज ऐकू यायला लागले आहेत. त्यामुळे बबिता आणि अय्यर घाबरून उठले आहेत. आवाज कुठून येतो आहे हे शोधायला गेल्यावर मशिन चालत असल्याचे बबिता आणि अय्यर यांच्या लक्षात आले आहे आणि घाबरून ते रात्रीच जेठालालला घरी बोलवायला गेले आहे. पण जेठालाल आल्यावर ती मशिन एकदम व्यवस्थित झाली आहे. त्यामुळे सोसायटीमधील सगळे एकत्र जमून ती मशिन चालण्याची वाट पाहात आहेत. पण ती मशिन काही केल्या चालत नाही. या मशिनचे रहस्य काय आहे हे लवकरच प्रेक्षकांना कळणार आहे. याविषयी या मालिकेत जेठालालची भूमिका साकारणारे दिलीप जोशी सांगतात, हे रहस्य काय आहे हे प्रेक्षकांना कळल्यावर त्यांना आश्चर्याचा धक्का बसणार आहे. Also Read : ​दिशा वकानी म्हणजेच दया सोडणार नाही तारक मेहता का उल्टा चष्मा