​एकता कौल सोडणार मेरे अंगने में

रब से सोना इश्क या मालिकेत प्रमुख भूमिका साकारलेली एकता कौल सध्या मेरे अंगने में या मालिकेत झळकत आहे. ती साकारत असलेल्या रिया या भूमिकेला प्रेक्षकांचा खूपच चांगला प्रतिसाद मिळत आहे. या मालिकेतील टीम ही एखाद्या कुटुंबाप्रमाणे बनली आहे. या मालिकेत एकतासोबत महत्त्वाच्या भूमिका साकारणाऱ्या चारू असोपा, प्रीती आणि गरिमा परिहार या सगळ्यांची एकमेकांशी खूप चांगली मैत्री आहे. मालिकेच्या सेटवर ते नेहमीच मजामस्ती करत असतात. काही दिवसांपूर्वी तर त्यांनी मालिकेच्या सेटवर मॅगी पार्टीदेखील केली होती. या सगळ्यांना जंक फूड आवडत असल्याने त्या नेहमीच सेटवर पार्टी करत असतात. आता एकता कौल मेरे अंगने में या मालिकेतला रामराम ठोकणार आहे. काही वैयक्तिक कारणांमुळे ती मालिका सोडणार असल्याचे कळतेय. एकताने मालिका सोडण्याचा निर्णय काही दिवसांपूर्वीच निर्मात्यांना कळवला आहे. पण तरीही फेब्रुवारीच्या शेवटच्या आठवड्यापर्यंत ती चित्रीकरण करणार आहे. ती मालिका सोडत असल्याने या मालिकेच्या कथानकात अनेक बदल केले जाणार आहेत. मुलाला जन्म देताना रियाचा मृत्यू झाल्याचे प्रेक्षकांना पाहायला मिळणार आहे. एकतासोबतच अनन्या खरेदेखील ही मालिका सोडणार असून त्यांचे चित्रीकरण पुढच्या आठवड्यात संपणार आहे. या मालिकेविषयी एकता सांगते, "माझ्या काही वैयक्तिक कारणांमुळे ही मालिका मी सोडत असून मी या मालिकेला आणि माझ्या व्यक्तिरेखेला खूप मिस करेन."खरे तर एकता जानेवारीतच मालिका सोडणार होती. पण अनन्यादेखील मालिका सोडत असल्याने एकताला निर्मात्यांनी काही दिवस थांबण्यास सांगितले असे म्हटले जात आहे.