टीव्ही शो 'नीरजा'च्या सेटवर बिबट्या घुसल्याने गोंधळ उडला. नुकतेच 'नीरजा'च्या सुरुवातीचे काही भागांचं कोलकातामध्ये शूटिंग करण्यात आले, त्यानंतर मुंबई फिल्मसिटीमध्ये एक कार्यक्रम आयोजित करण्यात आला होता. शोचे संपूर्ण कलाकार आणि क्रू उपस्थित होते. दरम्यान एक बिबट्या तेथे आला आणि सर्वांची घाबरगुंडी उडाली. भीतीमुळे सेटवरील लोकांची अवस्थाही बिकट झालेली.
मुंबईतील गोरेगाव परिसरात पसरलेल्या जंगलात बिबट्यांसह इतर वन्य प्राणी आहेत आणि त्यामुळे ते जवळपास राहणाऱ्या लोकांना दिसतात. अनेकवेळा वन्य प्राण्यांनी सेटवर प्रवेश केला आहे. यावेळीही तसेच झाले. रिपोर्ट्सनुसार, बिबट्या 'नीरजा: एक नई पेहचान'च्या सेटच्या बाल्कनीतून घुसला. सेटवरून बिबट्याचा व्हिडिओही समोर आला आहे.
सेटच्या छतावर अनेक माकडे पावसामुळे लपून बसल्याचे सांगण्यात येत आहे. त्या माकडांवर हल्ला करण्याच्या उद्देशाने बिबट्याने सेटमध्ये प्रवेश केला. मात्र लोकांची गर्दी पाहून माघारी फिरला. बिबट्या तिथून निघून गेला असला तरी त्याला पाहून सेटवरील लोकांच्या चेहऱ्यावर भीती स्पष्ट दिसत होती.
'नीरजा: एक नई पेहचानचा हा शो कलर्स वाहिनीवर १० जुलैपासून सुरू होत आहे. या शोमध्ये स्नेहा वाघ आणि काम्या पंजाबीसह मायरा वायकुळ दिसणार आहेत. नीरजा मालिकेत अभिनेत्री स्नेहा वाघ (Sneha Wagh) ही तिच्या आईची भूमिका साकारताना दिसणार आहे. माझी तुझी रेशीमगाठ' या मालिकेतून परीच्या भूमिकेतून मायरा घराघरात पोहोचली होती. मालिका बंद झाली असली तरी प्रेक्षकांच्या मनातील परीचं घर कायम आहे. ही मायराची पहिलीच हिंदी मालिका आहे. त्यामुळे तिचे चाहते या मालिकेची प्रतीक्षा करतायेत.