'महाराष्ट्राची हास्यजत्रा' शोमधून घराघरात पोहोचलेला अभिनेता म्हणजे पृथ्विक प्रताप. दमदार अभिनय आणि विनोदाचं अचूक टायमिंग साधत पृथ्विक प्रेक्षकांना खळखळवून हसवतो. अगदी कमी वेळात पृथ्विकने मराठी कलाविश्वात स्वत:चं वेगळं स्थान निर्माण केलं. अनेक मालिकांमध्ये काम करुन अभिनयाचा ठसा उमटवलेल्या पृथ्विकला हास्यजत्रेमुळे लोकप्रियता मिळाली.
पृथ्विकचा चाहता वर्ग मोठा असून तो सोशल मीडियावरही प्रचंड सक्रिय असल्याचं पाहायला मिळतं. पृथ्विकने नुकतंच मुंबईत त्याच्या स्वत:च्या हक्काचं नवीन घर खरेदी केलं आहे. सोशल मीडियावर पोस्ट शेअर करत त्याने ही माहिती चाहत्यांना दिली आहे. पृथ्विकने त्याच्या नवीन घराचे काही फोटो इन्स्टाग्रामवर शेअर केले आहेत. हे फोटो शेअर करत त्याने खास पोस्टही लिहिली आहे.
आजवर अनेक स्वप्नं पाहिली…अनेक पूर्ण केली…अनेक स्वप्नं जगली आणि अनेक स्वप्नं भंगलीसुद्धा... पण एक स्वप्न जे आज पर्यंत हुलकावणी देत होतं ते पूर्णत्वाला आलं. आयुष्याची ३० वर्षे आश्रितासारखी काढलेल्या प्रत्येकाला एक दहा बाय दहाचं छप्परही आभाळापेक्षा कमी नसतं…
आज स्वतःच्या घरापुढे उभं राहून हा फोटो काढताना खरंच आभाळ ठेंगणं झाल्यासारखं वाटतंय. घर छोटं आहे पण माझ्या कुटुंबाचं आहे. ही स्वप्नपूर्तीची वाटचाल अजून अशीच सुरु राहणार आहे कारण ‘Penthouse’ अभी बाकी है मेरे दोस्त…!
गंमत म्हणजे आज २ नोव्हेंबरला हे घर माझ्या नावावर झालंय म्हणजे ‘शाहरुख खान’च्या वाढ दिवशी... त्यामुळे माझी ‘मन्नत’ पुरी झाली अस म्हणायला हरकत नाही. हे घर मिळण्यासाठी अनेकांची निस्वार्थ मदत झाली. त्या प्रेत्यकाचा मी आयुष्यभर ऋणी राहीन.
पृथ्विकच्या या पोस्टवर चाहत्यांनी कमेंट करत त्याला शुभेच्छा दिल्या आहेत. हास्यजत्रेतील कलाकारांबरोबरच अनेक सेलिब्रिटींनीही पृथ्विकच्या या पोस्टवर कमेंट केल्या आहेत.