'महाराष्ट्राची हास्यजत्रा' (Maharashtrachi Hasyajatra) मधले सर्व कलाकार आज स्टार झाले आहेत. लोकप्रियतेच्या शिखरावर पोहोचले आहेत. चाहत्यांनी सर्वांना अक्षरश: डोक्यावर घेतलं आहे. मात्र या कलाकारांना इथपर्यंत पोहचण्यासाठी मोठा स्ट्रगल करावा लागला हेही तितकंच खरं आहे. अगदी हास्यजत्रेचा भाग होण्यासाठीही त्यांना कठीण ऑडिशन द्यावी लागली. हास्यजत्रेतील असाच एक लोकप्रिय कलाकार म्हणजे पृथ्वीक प्रताप (Prithvik Pratap). पृथ्वीकने आपल्या जबरदस्त विनोदाच्या टायमिंगने सर्वांचे मन जिंकले. पृथ्वीकने नुकतंच ज्येष्ठ अभिनेते अशोक सराफ यांच्यासाठी एक पोस्ट लिहिली आहे. त्यामुळे तो चर्चेत आला आहे.
पृथ्वीक प्रताप हा सोशल मीडियावर कायमच सक्रीय असतो. पृथ्वीकने इन्स्टाग्रामवर एक पोस्ट शेअर केली आहे. यात त्याने अशोक सराफ यांच्याबरोबरचे फोटो शेअर केले आहेत. त्याला त्याने भावूक असे कॅप्शन दिले आहे.
“अशोक मामांना आपलं नाव माहित असणं, त्यांनी आपल्या कामाचं कौतुक करणं आणि त्यात आपल्या कामासाठी संपूर्ण टीम ला त्यांच्यासमोर अवॅार्ड मिळणं… हे सारे स्वप्नवत आहे”, असं कॅप्शन पृथ्वीक प्रतापने या फोटोंसोबत दिलं आहे.
पृथ्वीकची हास्यजत्रेत निवड झाली आणि त्याचं नशीबच पालटलं. सध्या तो 'पोस्ट ऑफिस उघडं आहे' या मालिकेतही काम करत आहे. अनेक कठीण प्रसंगांना तोंड दिल्यानंतर तो आज यशस्वी झाला आहे. त्याचा हाच प्रवास त्याने मुलाखतीतून उलगडला आहे.