छोट्या पडद्यावरील अतिशय लोकप्रिय असलेल्या 'महाराष्ट्राची हास्यजत्रा' या शोमुळे अनेक नवोदित कलाकारांच्या करिअरला दिशा मिळाली. अनेक विनोदवीरांना हास्यजत्रेमुळे प्रसिद्धी मिळाली. यातीलच एक म्हणजे शिवाली परब. कल्याणची चुलबुली अशी ओळख मिळवलेल्या शिवालीने प्रेक्षकांच्या मनात घर केलं. हास्यजत्रेतून प्रेक्षकांना हसवणारी शिवाली अनेकांचा क्रश आहे.
हास्यजत्रेतून लोकप्रियता मिळवलेल्या शिवालीने अल्पावधीतच अभिनयाचा ठसा उमटवत स्वत:चं वेगळं स्थान निर्माण केलं. शिवालीने मालिका आणि चित्रपटातही काम केलं आहे. आता ती नव्या कोऱ्या गाण्यातून प्रेक्षकांच्या भेटीला आली आहे. 'मासोळी ठुमकेवाली' हे शिवालीचं नवं गाणं नुकतंच प्रदर्शित झालं आहे. या गाण्यात शिवालीबरोबर अभिनेता अभिजीत आमकरही झळकला आहे. शिवालीचा वेगळाच अंदाज या गाण्यातून पाहायला मिळत आहे. हे गाणं चाहत्यांच्याही पसंतीस उतरत आहे.
याआधी शिवालीचं 'पायल वाजे' हे गाणं प्रेक्षकांच्या भेटीला आलं होतं. 'पोस्ट ऑफिस उघडं आहे' या मालिकेतही शिवाली झळकली होती. 'प्रेम प्रथा धुमशान' या चित्रपटात शिवाली मुख्य भूमिकेत दिसली होती. शिवाली सोशल मीडियावरही प्रचंड सक्रिय असल्याचं पाहायला मिळतं. नवीन प्रोजेक्टबरोबरच अनेकदा ती फोटोही शेअर करताना दिसते.