अभिनेत्री हृता दुगुर्ळे (Hruta Durgule ) सध्या जाम चर्चेत आहेत. ‘अनन्या’पाठोपाठ हृताचा ‘टाईमपास 3’ हा सिनेमा प्रदर्शित होतोय. सिनेमांत प्रचंड बिझी होताच हृताने काही प्रोजेक्टला रामराम ठोकला आहे. विविध प्रोजेक्ट सोडल्यामुळे सध्या हृताला ट्रोल केलं जात आहे. हृताची ‘मन उडू उडू झालं’ ( Man Udu Udu Zhala) ही मालिका प्रेक्षकांचा निरोप घेणार आहे. सोबतच हृताने ‘दादा एक गुडन्यूज’ हे नाटकही सोडलं आहे. सलग दोन मोठ्या प्रोजेक्टमधून बाहेर पडल्यामुळे हृताला लोकांनी ट्रोल करायला सुरूवात केली होती. हृताने पती प्रतिक शाह (Hruta Durgule and Prateek Shah) याच्या सांगण्यावरून हे दोन मोठे प्रोजेक्ट सोडल्याचा आरोपही नेटकऱ्यांनी केला होता. आता या सगळ्यावर हृता रिअ‍ॅक्ट झाली आहे. तिच्या प्रोफेशनल लाईफमध्ये वारंवार नवऱ्याचं नाव घेतलं जात असल्याबद्दल तिने नाराजी व्यक्त केली आहे.
माझा नवरा प्रतिक माझ्या आयुष्यातला एक अत्यंत महत्त्वाचा व्यक्ती आहे, हे खरं आहे. पण म्हणून तो माझे निर्णय घेत नाही. गेली दहा वर्ष मी अपार कष्ट घेत माझं करिअर घडवलं आहे. त्यामुळे सरसकट असा काहीही निष्कर्ष काढण्याआधी चाहत्यांनी विचार करायला हवा. माझा चाहतावर्ग असंवेदनशील असावा, असं मला वाटत नाही, असं हृता म्हणाली. हृता व प्रतिक यांनी गेल्या 18 मे रोजी लग्नगाठ बांधली होती. त्यांच्या लग्नावरून सुद्धा हृताला बऱ्याच नकारात्मक कमेंट्सना सामोरं जावं लागलं होतं.