'आई कुठे काय करते' (aai kuthe kay karte) ही मालिका सध्या छोट्या पडद्यावरील तुफान लोकप्रिय मालिका असल्याचं पाहायला मिळतं. अनिरुद्ध आणि अरुंधती यांच्या घटस्फोटानंतर या मालिकेत अनेक रंजक वळण येत आहेत. एकीकडे अरुंधती मुक्तपणे सर्वत्र वावरत आहे. तर, संजना मात्र, आता घरकामाला जुंपली आहे. विशेष म्हणजे काम करायचा कायम कंटाळा करणारी संजना आता कंबर कसून घरकाम करताना दिसणार आहे.
सध्या सोशल मीडियावर या मालिकेचा एक प्रोमो व्हायरल होत आहे. या प्रोमोमध्ये कांचन होळीच्या दिवशी घरात कशा पद्धतीचा स्वयंपाक केला जातो हे संजनाला सांगत असते. संजनादेखील मोठ्या उत्साहात ऐकत असते. मात्र, अनघा हा सगळा स्वयंपाक घरच्या मोठ्या सुनेने करायचा असं सांगून स्वयंपाकाची सगळी जबाबदारी संजनावर ढकलते. त्यामुळे आता संजनाला नाईलाजाने घरातील कामं करावी लागणार आहेत.
दरम्यान, एकेकाळी अरुंधतीला हाऊस वाईफ म्हणून हिणवणाऱ्या संजनाला घरातील प्रत्येक काम करावी लागत आहेत. तर दुसरीकडे सतत घरासाठी धडपडणारी अरुंधती आता स्वत: साठी जगू लागली आहे. त्यामुळे मालिकेत झालेला हा बदल प्रेक्षकांना मनापासून आवडत आहे.