'बिग बॉस 17' संपला असला तरी त्याचीच सर्वत्र चर्चा सुरू आहे. यावेळी मुनव्वर फारुकीने ट्रॉफीवर आपलं नाव कोरलं आहे. तर अभिषेक कुमार या सीझनचा उपविजेता ठरला. स्वत:च्या वाढदिवशी बिग बॉसचं विजेतेपद जिंकल्यानं हा दिवस मुनव्वर फारुकीसाठी खास राहिला. ग्रँड फिनालेनंतर मुनव्वर फारूकीचं बर्थडे सेलिब्रेशन धुमधडाक्यात झालं. यावेळी रॅपर एमसी स्टॅनही त्याला शुभेच्छा देण्यासाठी पोहचला. याचे काही फोटो आणि व्हिडीओ समोर आले आहेत.
विजेता म्हणून बाहेर बिग बॉसमधून बाहेर पडल्यानंतर मुनव्वर फारुकीने रॅपर एमसी स्टॅन आणि इतर काही मित्रांसोबत वाढदिवस साजरा केला. 'हा वाढदिवस आजपर्यंतचा सर्वात खास आहे, जो तो कधीही विसरू शकत नाही. तुमच्या सर्वांच्या प्रेमाबद्दल खूप-खूप धन्यवाद', असे म्हणत मुनव्वरने सर्वांचे आभार मानले. व्हिडीओमध्ये मुनव्वर केक कापताना दिसून येत आहे. तर त्याच्या बाजूला रॅपर एमसी स्टॅन उभा असल्याचे पाहायला मिळते.
मुनव्वर फारुकी मूळचा गुजरातच्या जुनागडचा आहे, पण तिथून तो वडिलांसोबत मुंबईत डोंगरी परिसरात राहायला आला. मुनव्वर बिग बॉस जिंकल्यानंतर त्याच्या चाहत्यांनी एकच जल्लोष केला आहे. बिग बॉसची ट्रॉफी मुनव्वरच्या हाती पडताच डोंगरीच्या पोरांचा आनंद मात्र गगनात मावेनासा झाला. याआधी देखील मुनव्वरनं लॉकअप या शो जिंकली होता तेव्हाही डोंगरीकरांनी मुनव्वरचं दणक्यात स्वागत करत मिरवणूक काढली होती. तसेच यावेळी डोंगरीतील लोकांकडून जल्लोष करण्यात आला.