महानायक अमिताभ बच्चन (Amitabh Bachchan) सध्या ‘कौन बनेगा करोडपती 14’ मुळे (Kaun Banega Crorepati 14 ) चर्चेत आहेत. या लोकप्रिय शोमध्ये अनेक कलाकार आपल्या चित्रपटाच्या प्रमोशनसाठी येतात. कालच्या एपिसोडमध्ये ‘ऊंचाई’ या आगामी चित्रपटाची टीम प्रमोशनसाठी पोहोचली होती. या चित्रपटात अमिताभ बच्चन हेही मुख्य भूमिकेत आहेत. त्यांच्याशिवाय अनुपम खेर (Anupam Kher), बोमन इराणी ( Boman Irani), नीना गुप्ता (Neena Gupta) यांच्या प्रमुख भूमिका आहेत. या सर्वांनी ‘कौन बनेगा करोडपती 14’च्या सेटवर धम्माल मस्ती केली. सोबत अमिताभ यांनी अनेक खुलासेही केली.विशेष म्हणजे, या एपिसोडमध्ये नीना गुप्ता होस्ट बनल्या आणि अमिताभ बच्चन यांनी त्यांच्या प्रश्नांची उत्तरं दिलीत. एका प्रश्नाचं उत्तर देताना बिग बी भावुक झालेले दिसले.
‘ तुम्हाला तुमच्या आयुष्यात कोणती गोष्ट बदलायला आवडेल?’, असा प्रश्न नीना गुप्ता यांनी अमिताभ यांना केला. नीना यांनी विचारलेल्या या प्रश्नानं अमिताभ यांना भावुक केलं. ‘ मला काहीही बदलायचं नाही. यापेक्षा जे सुरु आहे तेच नव्यानं जगायला मला आवडेल,’असं उत्तर अमिताभ यांनी दिलं. माझ्या आयुष्यात जे काही बरे वाईट प्रसंग आलेत, त्यातून मी घडलो. या प्रसंगांनी, अनुभवांनी मला खूप काही शिकवलं. याचमुळे आज मी इथे आहे, असंही अमिताभ म्हणाले. त्यांच्या या उत्तरावर प्रेक्षकांनी टाळ्यांचा कडकडाट केला.
या एपिसोडमध्ये अमिताभ यांनी त्यांच्या होस्टेल दिवसाच्या आठवणीही ताज्या केल्या. त्यांनी सांगितलं, ‘त्यावेळी माझ्याकडे फार पैसे नसायचे. पण चित्रपटांवर माझं प्रेम होतं. याच प्रेमापोटी मी सिनेमा हॉलच्या मॅनेजरला विनंती करायचो आणि चित्रपटगृहांत विना तिकिट जमिनीवर बसून चित्रपट पाहायचो.’‘ऊंचाई’ हा सिनेमा येत्या 11 नोव्हेंबरला प्रदर्शित होतोय. परिणीती चोप्रा हिची या चित्रपटात महत्त्वपूर्ण भूमिका आहे.