स्टार प्रवाह वाहिनीवरील लोकप्रिय मालिका 'आई कुठे काय करते' (Aai Kuthe Kay Karte) सध्या उत्कंठावर्धक वळणावर आली आहे. या मालिकेत येणाऱ्या ट्विस्टमुळे ही मालिका प्रेक्षकांच्या पसंतीस उतरली आहे. मालिकेत नुकताच अरुंधतीचा पहिला म्युझिक अल्बम रिलीज झाला आहे आणि या अल्बमला प्रेक्षकांची खूप पसंती मिळते आहे. मात्र आता मालिकेत नवीन ट्विस्ट पाहायला मिळतो आहे. घटस्फोटानंतरही अनिरुद्ध अरुंधतीला देशमुख कुटुंबात सामील करून घेतो आहे.
आई कुठे काय करते मालिकेत काही दिवसांपूर्वी प्रसारीत झालेल्या भागात पाहायला मिळाले की, संजनाने समृद्धी बंगला स्वतःच्या नावावर केल्याचे सर्वांना समजते. अनिरुद्ध सोबत सगळेच तिच्यावर नाराज होतात. आप्पांची समजूत घालवून अरुंधती त्यांना घरी परत आणते. त्यावेळी अनिरुद्ध अरुंधतीचे आभार मानतो आणि तो तिला तुला हवे तेव्हा तू समृद्धी बंगल्यात येऊ शकतेस असे सांगतो. हे सर्व पाहून संजनाचा जळफळाट होतो.
दरम्यान कांचन आईच्या वाढदिवसाचा सर्वजण प्लान करतात. अरुंधतीदेखील तिथे जाणार असते. तिथे जात असताना तिला रस्त्यात आप्पा हताश होऊन चालताना दिसतात. त्यावेळी अरुंधती आणि आशुतोष त्यांना पाहतात. मग अरुंधती आप्पांची समजूत घालून कांचन आईंसाठी कांजीवरम साडी घेऊन जातात. त्यामुळे कांचन आई खूप खूश होते. पुन्हा एकदा घरात आनंदी वातावरण पाहायला मिळाले.
दरम्यान नुकत्याच समोर आलेल्या प्रोमोत पाहायला मिळाले की, कांचन आईचा वाढदिवस साजरा केल्यानंतर सर्वजण फॅमिली फोटो काढत असतात. त्यावेळी अरुंधती लांब उभी असते. मात्र अनिरुद्ध तिला या फोटोसाठी बोलवतो. मात्र संजनाला बोलवत नाही. यावरून घटस्फोट झाल्यानंतरही अनिरुद्धचे अरुंधतीवर प्रेम असल्याचे पाहायला मिळते. आता संजना काय करणार, हे पाहणे कमालीचे ठरणार आहे.