राष्ट्रीय स्वयंसेवक संघाच्या विजयादशमी व शस्त्रपूजन उत्सवाला नागपुरातील रेशीमबाग मैदानात पार पडला. सरसंघचालक डॉ.मोहन भागवत यांच्या उपस्थितीत होत असलेल्या या कार्यक्रमाला प्रसिद्ध गायक व संगीतकार शंकर महादेवन उपस्थित आहेत. विशेष म्हणजे मराठमोळी अभिनेत्री प्राजक्ता माळीने संघाच्या दसरा मेळाव्याला उपस्थित राहुन सगळ्यांचं लक्ष वेधलं आहे.
प्राजक्ताने सोशल मीडियावर व्हिडीओ आणि RSSच्या कार्यक्रमाची पत्रिका शेअर केली आहे. विजयादशमीच्या कार्यक्रमात सहभागी झाल्यानंतर प्राजक्ताने सोशल मीडियावर एक पोस्ट शेअर केली आहे, जी पाहून अनेकांच्या भुवया उंचावल्या आहेत.
प्राजक्ताने लिहिले, "आज आयुष्यात पहिल्यांदा “राष्ट्रीय स्वयंसेवक संघाचा - विजयादशमी उत्सव” अनुभवता आला. ते ही ‘केंद्रिय मंत्री - नितीनजी गडकरी व उपमुख्यमंत्री देवेंद्रजी फडणवीस’ यांच्या समवेत. समस्त संघ परिवाराचे यासाठी मनापासून आभार." प्राजक्ताने हि पोस्ट शेअर केल्यानंतर यावर नेटकऱ्यांनी विविध प्रतिक्रिया कमेंट्सच्या माध्यमातून द्यायला सुरुवात केली आहे.
एकाने लिहिले, ''हे संकेत आहे की लवकरच तुझी भाजपमध्ये एन्ट्री होणार..'', दुसऱ्या एकाने लिहिले, ''तिकिट फिक्स आहे.'' आणखी एक नेटकऱ्याने लिहिले, ''हार्दिक अभिनंदन, आता तुम्ही खूप लोकांच्या नावडत्या होणार, पण काही हरकत नाही, आगे बढ चलो.'' अशा संमिश्र प्रतिक्रिया तिच्या या पोस्टवर येत आहेत.
सध्या प्राजक्ता 'महाराष्ट्राची हास्यजत्रा' कार्यक्रमाचं सूत्रसंचालन करत आहे. तिने मालिकांबरोबरच चित्रपटांतही काम केलं आहे. अभिनेत्री असण्याबरोबरच प्राजक्ता उत्तम नृत्यांगणाही आहे. 'रानबाजार' या वेब सीरिजमध्येही प्राजक्ता झळकली होती.