‘किचन कल्लाकार’ (Kitchen Kallakar) हा झी मराठीवरचा प्रेक्षकांचा आवडता शो. खमंग पदार्थ आणि सोबतीला धम्माल मज्जा, किस्से असा हा शो सध्या चांगलाच चर्चेत आहे. कलाकार मंडळींसह राजकीय मंडळीही या शोमध्ये अधूनमधून दिसतात. नुकतीच रिपाइंचे अध्यक्ष रामदास आठवले (Ramdas Athawale) यांनी या शोमध्ये सपत्नीक हजेरी लावली. मग काय? धम्माल किस्से रंगले. घरात भाजी आणायचं काम माझंच असते. मी आणतो भाजी कारण मला लागते ताजी..., असं रामदास आठवले म्हणाले आणि एकच खसखस पिकली. शिवाय याच कार्यक्रमात आठवले साहेबांनी अजित पवारांना खास सल्लाही दिला. अजित पवारांवर एक उत्स्फूर्त कविताही त्यांनी यावेळी ऐकवली.
अजितदादांना दिला खास सल्ला...झी मराठीने ‘किचन कल्लाकार’चा एक प्रोमो शेअर केला आहे. यात रामदास आठवलेंना अजित पवार यांचा फोटो दाखवला जातो. हा फोटो पाहून आठवले लगेच कविता ऐकवतात.‘जे करतात अनेक वेळेला वादा...अन् पुरा करत नाहीत ते आहेत अजित दादा...’, अशा शब्दांत ते अजित दादांची ओळख करून देतात. तुम्ही त्यांना काय सल्ला द्याल? असा प्रश्न केल्यावर आठवले म्हणतात, ‘त्यांना सल्ला आमचा एवढाच आहे की, शिवसेनेला दिलेला पाठींबा त्यांनी ताबडतोब काढावा...त्यांनी पाठींबा काढला की आम्ही बीजेपीवाले,देवेन्द्र फडणवीस...आम्ही तर तयारच बसलो आहोत...’
या व्हिडीओमध्ये रामदास आठवले त्यांच्या विनोदीशैलीनं कार्यक्रमात उपस्थित असणा-यांना खळखळून हसवताना दिसत आहेत. अभिनेता प्रशांत दामले हे रामदास आठवले यांच्याकडून खवय्ये नगरीच्या प्रगतीसाठी टिप्स द्यायला सांगतात. यावेळी रामदास आठवले म्हणतात, ‘झी-टिव्हीचे आणि माझे जमले आणि इथे आले दामले’. ‘किचन कल्लाकार’ हा एपिसोड आज (23 जून) प्रेक्षकांच्या भेटीस येणार आहे. या एपिसोडचे काही प्रोमो व्हिडीओ सध्या सोशल मीडियावर व्हायरल होत आहेत.
'किचन कल्लाकार' या कार्यक्रमात अभिनेता प्रशांत दामले (Prashant Damle) परिक्षकाच्या भूमिकेत आहेत. तर अभिनेता संकर्षण क-हाडे सूत्रसंचालकाची भूमिका बजावत आहे. आतापर्यंत या शोमध्ये अनेक दिग्गज व्यक्तींनी हजेरी लावली आहे. कलाविश्वापासून ते राजकीय व्यक्तीमत्त्वांपर्यंत अनेक जण या शोमध्ये सहभागी झाल्याचं पाहायला मिळालं.