समता सागरच्या ऑनस्क्रीन बदलेला अंदाज पाहून श्रेणू पारिखने दिली ही प्रतिक्रीया

छोट्या पडद्यावरील  ‘हर शाख पे उल्लू बैठा है’ ही राजकीय विडंबनात्मक मालिका आहे.सत्तापदासाठी चैतूलाल (राजीव निगम) हा भ्रष्ट नेता आणि त्याच्या कुटुंबियांकडून केल्या जाणा-या कट-कारस्थानांचे चित्रण यात करण्यात आले आहे.या मालिकेत चैतूलालच्या पत्नीची,इमलीदेवीची भूमिका हिंदी चित्रपट आणि टीव्ही मालिकांतील नामवंत अभिनेत्री समता सागर साकारीत आहे. ‘स्टार प्लस’वरील इश्कबाझ मालिकेतील श्रेणू पारेख आणि समता सागर यांच्यात एक समान दुवा आहे, ही गोष्ट फारशी कोणाच्या लक्षात नसेल; या शोआधी समता आणि श्रेणू यांनी पूर्वी एका मालिकेत माय-लेकींच्या भूमिकेत झळकल्या होत्या.याविषयी श्रेणू म्हणाली,“मला आठवतंय,समता सागरने मला सांगितलं होतं की तिला मनापासून एखादी भूमिका आवडली तरच ती अशी भूमिका स्वीकारते.आता ती या आगामी विनोदी मालिकेत एका कॉमेडी भूमिकेत दिसणार आहे.या मालिकेतील इतर कलाकारही असेच लोकप्रिय आहेत.तिच्यासाठी ही भूमिका म्हणजे तिच्या आजवरच्या सर्व भूमिकांपेक्षा अगदी भिन्न स्वरूपाची असून मी तिला कधीच अशा अवतारात बघितले नव्हते.पूर्वी तिने माझ्या आईची भूमिका रंगविली होती, तेव्हा ती एक गंभीर आणि भावनाप्रधान भूमिका होती.आता मात्र ती इमलीदेवीच्या भूमिकेत फारच गोड आणि मजेशीर दिसते आहे.ती एक उत्कृष्ट अभिनेत्री असून ती ही भूमिका अतिशय उत्तमपणे पार पाडील,याचा मला विश्वास आहे.मी ही मालिका पुन्हा पुन्हा बघितली असून ती एक चांगली राजकीय विडंबन मालिका आहे.या मालिकेच्या सा-या टीमला,विशेषत: समता सागरला माझ्या शुभेच्छा!”आपल्या पडद्यावरील मुलीबद्दल समता सागर म्हणाली, “श्रेणू ही मला माझ्या मुलीसारखीच असून मला ती फार आवडते.आम्ही दोघींनी एकत्रितपणे खूप मजा केली आहे. तिच्याबरोबर काम करताना मला खूप मजा आली आणि एक अभिनेत्री म्हणून मी तिच्याकडून बरंच काही शिकले आहे.मला आजपर्यंत तिच्याइतकी प्रेमळ मुलगी भेटलेली नाही.तिच्याबरोबर मला पुन्हा काम करण्याची संधी मिळो, हीच माझी इच्छा आहे.”तसेच या शोमध्ये कॉमेडीयन भारती सिंह एका पाहुण्या कलाकाराच्या भूमिकेत एंट्री करणार आहे.आतापर्यंत तिने अनेक टीव्ही कार्यक्रमांमध्ये भूमिका साकारल्या असून विनोद अचूकतेने उभा करण्याच्या तिच्या कौशल्याची सर्वत्र प्रशंसा होत असते.आता ती पुन्हा एकदा या मालिकेत भूमिका रंगविणार असल्याने प्रेक्षकांनाही ही भूमिका हसून हसून लोटपोट करणार हे मात्र नक्की.