वाढणार बिग बॉस मराठीची शान... जेंव्हा मंचावर येणार “भाईजान”... घरातले स्पर्धक आणि प्रेक्षक ज्या क्षणाची वाट आतुरतेने बघत होते तो क्षण आता आला आहे. बिग बॉस मराठी सिझन ३ च्या चावडीवर सदस्यांना ‘सरप्राईझ’ मिळणार आहे.कारण आपल्या सगळ्यांचा लाडका, यारो का यार बॉलीवूडचा भाईजान आणि हिंदी बिग बॉसचा होस्ट सलमान खान बिग बॉस मराठीच्या मंचावर येणार आहे. बिग बॉस मराठीच्या सेटवर सलमान खानची धम्माकेदार एन्ट्री होणार आहे. घरातील सदस्य सलमान खानला बघून खुश तर होणारच, पण त्यांची इच्छा देखील पूर्ण होणार आहे असे म्हणायला हरकत नाही. नुकत्याच समोर आलेल्या प्रोमोमुळे प्रेक्षकांची उत्सुकता शिगेला पोहचली आहे. प्रोमोमध्ये महेश मांजरेकर यांनी जाहीर केले, “आपल्या चावडीवर येणार आहे एक खास पाहुणा”. त्याचसोबत सलमान खानने देखील सांगितले “मी येतोय बिग बॉस मराठीच्या चावडीवर” याचसोबत त्याने “ओ भाऊ जरा चावडीवर या” असे देखील जाहीर केले.
छोट्या पडद्यावरील रियालिटी शो बिग बॉस मराठी ३ मध्ये घरातील स्पर्धकांची भांडणं, वाद-विवाद या सगळ्या गोष्टी पाहायला मिळतात. त्यामुळे मराठी बिग बॉसची उत्सुकता दिवसेंदिवस वाढत आहे. बिग बॉसच्या माध्यमातून विविध सिनेमांचं प्रमोशन करण्यात येतं. दबंग सलमान सध्या त्याच्या आगामी 'अंतिम'च्या प्रमोशनमध्ये बिझी आहे. सिनेमाच्या प्रमोशनसाठीच सलमान खान मराठी बिग बॉसच्या घरात एंट्री करणार आहे. 'अंतिम' या सलमान खानच्या आगामी सिनेमाचं दिग्दर्शन महेश मांजरेकर यांनी केले आहे. सलमानचा बहुप्रतिक्षित 'अंतिम' सिनेमा रिलीजसाठी तयार आहे.
गेल्याच आठवड्यात 'बिग बॉस 15' सलमान खान सोबत महेश मांजरेकर सर्व सदस्यांचा क्लास घेताना दिसले.'बिग बॉस 15' चा वीकेंड का वार हा एपिसोड खूप हिट ठरला. महेश मांजरकेर यांनी स्पर्धकांमध्ये झालेला गैरसमज दूर केल्याचे पाहायला मिळाले. त्यांनी कोण्या एकाची बाजु घेतली नाही. प्रत्येकाची बाजु समजूनच आपले मतं मांडताना दिसले. त्यामुळे हिंदी रसिकांनीसुद्धा सलमानपेक्षा महेश मांजेरकर यांनाच अधिक पसंती दिली होती.