पिया अलबेलाच्या सेटवर संगीताची मैफिल

पिया अलबेला या मालिकेत शीना दास, अक्षय म्हात्रे, तुषार खन्ना आणि पारुल चौधरी प्रमुख भूमिका साकारत आहे. या सगळ्यांच्या अभिनयाचे चांगलेच कौतुक सध्या होत आहे. ही मालिका सुरू होऊन आता काही महिने झाले आहेत. चित्रीकरणाच्यावेळी हे कलाकार अधिकाधिक वेळ एकमेकांसोबत घालवत असल्याने हे सगळेच एकमेकांचे खूप चांगले फ्रेंड्स बनले आहेत. ते चित्रीकरणानंतरदेखील एकत्र फिरायला जातात. तसेच खूप मजा-मस्ती करतात. या मालिकेत मयांकची भूमिका साकारणारा अभिनेता तुषार खन्ना हा एक चांगला अभिनता असण्यासोबतच त्याला गायनाची आवड आहे. त्याचा आवाज खूप चांगला असून तो गिटारही उत्तम वाजवतो. रोज चित्रीकरणादरम्यान तो गिटार वाजवताना पाहायला मिळतो. तसेच त्याच्या मेकअप रूममध्ये नेहमीच तो विविध गाणी गात असतो आणि त्याला त्याच्या मालिकेतील सहकलाकार साथ देत असतात. तुषार त्याच्या गायनाच्या पॅशनविषयी सांगतो, मी नववीत असल्यापासून गिटार वाजवत आहे. लहानपणापासूनच मला संगीताची आवड होती. ताण दूर करण्याचा सगळ्यात चांगला उपाय हे संगीत आहे असे मी मानतो. अभिनय ही माझी आवड असली तरी संगीत हा माझा आत्मा आहे. चित्रीकरणाच्या दरम्यान ब्रेक मिळाला की सगळे सहकलाकार माझ्या मेकअप रूममध्ये येतात आणि मी गिटार वाजवतो. गुलाबी आँखे आणि चन्ना मेरेया ही गाणी मी गिटारवर खूप छान वाजवतो आणि गातो असे त्याचे म्हणणे आहे. मला सत्तरीच्या दशकातील तसेच आजच्या नवीन काळातील अनेक गाणी आवडतात. त्यामुळे जुनी-नवीन सगळीच गाणी आम्ही गात असतो. या सगळ्यामुळे सेटवरचे वातावरणदेखील खूप छान होते.