'नकटीच्या लग्नाला यायचं हं' मालिका घेणार रसिकांचा निरोप,नवी मालिका रसिकांच्या भेटीला येणार

छोट्या पडद्यावरील नकटीच्या लग्नाला यायचं हं ही मालिका रसिकांच्या पसंतीस पात्र ठरली आहे. देशपांडे कुटुंबातील सा-यांची लाडकी नुपूर अर्थात नकटूच्या लग्नाची कथा मांडणारी ही मालिका. नकटूच्या लग्नाचा घाट, तिचं लग्न ठरवताना येणा-या अडचणी आणि यावेळी घडणारी धम्माल मस्ती रसिकांनी या मालिकेच्या माध्यमातून अनुभवली. अल्पावधीतच ही मालिका रसिकांची फेव्हरेट मालिका आणि या मालिकेतील नकटू लाडकी बनली. नकटूसाठी वरसंशोधनाचा आणि कांद्यापोह्याचा हा कार्यक्रम रसिकांना भावला. विनोदी मालिका रसिकांवर जादू करुन गेली. यांत नकटू साकारणारी प्राजक्ता माळी हिचा अभिनय रसिकांच्या मनात घर करुन गेला. यावेळी तिला पाहायला येणा-या कलाकारांनाही तितकीच दाद मिळाली. मात्र आता या मालिकेच्या फॅन्ससाठी निराशाजनक बातमी आहे. नकटीच्या लग्नाला यायचं हं ही मालिका छोट्या पडद्यावरुन लवकरच रसिकांचा निरोप घेणार आहे. या मालिकेच्या जागी आता नवी मालिका रसिकांच्या भेटीला येणार आहे. ८ नोव्हेंबरपासून हम तो तेरे आशिक हैं ही मालिका रसिकांच्या भेटीला येणार आहे. या नव्या मालिकेचे प्रोमो सध्या झळकत आहेत. या प्रोमोमध्ये अभिनेता पुष्कर श्रोत्रीचा आवाज ऐकायला मिळत आहे. या मालिकेत पुष्करची काय भूमिका असणार याची रसिकांना उत्सुकता लागली आहे. नुकतंच काही दिवसांपूर्वी सिनेमा दिग्दर्शक म्हणून नवी इनिंग सुरु केली होती. त्याने दिग्दर्शित केलेला उबुंटू हा सिनेमा रसिकांना भावला. आता मोठ्या पडद्यानंतर पुष्कर हम तो तेरे आशिक हैं या मालिकेतून रसिकांच्या भेटीला येणार का हे ८ नोव्हेंबरला स्पष्ट होईल.मराठीमध्ये टीव्ही अभिनेत्रींमध्ये सगळ्यांत जास्त लोकप्रिय अभिनेत्री म्हणून प्राजक्ता माळीकडे पाहिले जाते.'जुळुन येतील रेशीमगाठी' म्हणत प्राजक्ता महाराष्ट्राच्या घराघरात पोहोचली होती.या मालिकेनंतर प्रेक्षक पुन्हा प्राजक्ताला नवीन भूमिकेत पाहण्यासाठी उत्सुक होते.त्यामुळेच 'नकटीच्या लग्नाला यायचं हं' म्हणत तिने पुन्हा एकदा दणक्यात एंट्री घेतली होती आणि नकटी बनत हळुहळु प्राजक्तारने रसिकांना फुल ऑन एंटरटेन केलं.आतुरतेने प्राजक्ताची वाट पाहणा-या रसिकांसाठी 'नकटीच्या लग्नाला यायचं हं' या मालिकेने प्रेक्षकांची प्राजक्ताला पुन्हा ऑनस्क्रीन पाहण्याची इच्छा पूर्ण केली.मालिकेत प्रजाक्ताने रंगवलेली 'नकटी'चा अंदाज रसिकांच्या पसंतीस पडत आहे.मालिकेतल्या तिच्या अभिनयामुळे तिच्या चाहत्यावर्गातही दिवसेंदिवस वाढ होत आहे.आपल्या प्रतिक्रीया थेट प्राजक्तापर्यंत पोहचाव्या म्हणून सोशल मीडिया हा एक उत्तम माध्यम.चाहते तिला फेबसबुक,इन्स्टाग्रामच्या माध्यमातून तिच्याशी कनेक्ट होत तिला एक से बढकर एक भन्नाट प्रश्न विचारताना दिसतात.