'सुंदरा मनामध्ये भरली' मालिकेतील अभिनेत्रीची पोलिसांत धाव, घडला धक्कादायक प्रकार

Sundra Manamadhye Bharli: 'सुंदरा मनामध्ये भरली' मालिकेतील अभिनेत्रीने तिच्यासोबत घडलेल्या घटनेबद्दल इंस्टाग्रामवर स्टोरीवर पोस्ट शेअर करत सांगितले होते.

सिनेइंडस्ट्रीत बऱ्याच कलाकारांना त्यांच्याविषयी अपमानास्पद आणि निंदनीय वक्तव्य केले जाते. तसेच सोशल मीडियावर त्यांना ट्रोल केले जाते. यामुळे अनेक कलाकारांना नाहक त्रास सहन करावा लागतो. असेच काहीसे सुंदरा मनामध्ये भरली (Sundra Manamadhye Bharli) मालिकेतील अभिनेत्रीसोबत घडले आहे. ही अभिनेत्री इतर कुणी नसून 'सुंदरा मनामध्ये भरली' फेम 'कामिनी' अर्थातच पूजा पुरंदरे (Pooja Purandare).

अभिनेत्री पूजा पुरंदरेलासुद्धा 'सायबर अब्युझिंग'ला सामोरं जावे लागले आहे. इतकेच नव्हे तर हे प्रकरण आता पोलिसांपर्यंत पोहोचले आहे. पूजा पुरंदरेने स्वतः आपल्या सोशल मीडिया पोस्टद्वारे याबाबत खुलासा केला आहे. यासोबतच सर्वांना खास विंनतीदेखील केली आहे. अभिनेत्रीची ही पोस्ट पाहून काही जणांकडून सोशल मीडियाचा गैरवापर होतोय की काय? असा प्रश्न पुन्हा एकदा उपस्थित झाला आहे.

अभिनेत्री पूजाने लिहिले, 'गेल्या काही दिवसांपासून मला इन्स्टाग्रामवर अनेक मेसेज आणि पोस्ट टॅग्स मिळत आहेत. एका विशिष्ट अकाउंटवरुन मला स्टोरीला किंवा पोस्टला टॅग केले जात आहे. जे खूप निंदनीय,अपमानास्पद आणि धमकीवजा होते. सुरुवातीला मी या गोष्टीला हलक्यात घेतले, त्याकडे दुर्लक्ष केले. मला वाटले की या इंडस्ट्रीमध्ये काम करण्याचे हेसुद्धा काही परिणाम आहेत'.

ती पुढे म्हणाली की, 'मला वाटतं प्रत्येकाने कधी ना कधी ट्रोलिंगसारख्या प्रकाराचा सामना केला असेल. परंतु काल मी फारच निराश झाले. मला प्रचंड दुःख झालं आणि मी ठरवलं. आता आणखी या सर्व गोष्टी सहन करायच्या नाहीत. मी मोठा निर्णय घेत त्या व्यक्ती विरोधात पोलिसांत तक्रार दाखल केली आहे. कारण त्या व्यक्तीने माझी इमेज खराब करण्याचा प्रयत्न केला आहे. तसेच अभिनेत्रीने आवाहन करत म्हटलं कृपा करून अशा गोष्टी सहन करु नका आणि इतरांबाबत बोलण्यापेक्षा स्वतःबद्दल बोला आणि नेहमी आनंद पसरवत राहा'.