‘तारक मेहता का उल्टा चष्मा’मध्ये (Taarak Mehta Ka Ooltah Chashmah) जेठालालची भूमिका साकारणारे अभिनेते दिलीप जोशी (Dilip Joshi ) यांची लाडकी लेक नियती नुकतीच लग्नबंधनात अडकली. गेल्या 11 डिसेंबरला नियतीचा लग्नसोहळा अगदी थाटामाटात पार पडला. या शाही लग्नाच्या प्री-वेडिंग सेरेमनीचे फोटो तुम्ही पाहिले असतीलच. आता लग्नाचे फोटो समोर आले आहेत. दिलीप जोशी यांनी स्वत: लेकीच्या लग्नाचे काही खास फोटो सोशल मीडियावर शेअर केले आहेत.‘तुम्ही गाणी आणि चित्रपटांमधून भावना पाहू शकता. पण प्रत्यक्षात घडतात तेव्हा तो अनुभव अद्भूत असतो,’ अशा आशयाची पोस्ट शेअर करत जेठालाल यांनी मुलीच्या लग्नाचे काही फोटो पोस्ट केले आहेत.
सोशल मीडियावरही दिलीप जोशींचे लेकीच्या लग्नातील काही फोटो व्हायरल झाले आहेत. एका फोटोत दिलीप जोशी नववधूच्या पोशाखात लेकीला पाहून भावुक झाल्याचे दिसत आहेत. नियतीने लग्नसोहळ्यात लाल रंगाची बनारसी साडी आणि त्यावर भरजरी दागिने असा श्रृंगार केला होता. दिलीप जोशी यांचा जावई यशोवर्धन मिश्रा हा एनआरआए आहे.
मुलीच्या संगीत सेरेमनीमध्ये दिलीप जोशी यांनी जबरदस्त डान्स केला होता. ज्याचा व्हिडीओ सोशल मीडियावर व्हायरल झाला होता. या शाही लग्नसोहळ्यात ‘तारक मेहता का उल्टा चष्मा’ मालिकेतील अनेक कलाकारांची खास हजेरी लावली. मालिकेचे दिग्दर्शक मालव राजदा, त्यांची पत्नी प्रिया अहुजा, अभिनेते सुनन्या फौजदार, पलक सिंधवानी, कुश शाह, समय शाह आणि इतरही कलाकार या लग्नसोहळ्याला उपस्थित होते.